مصطفى الشاذلي ـ كود سبور//

الوداد رجع مكمل بعد «الحجر الصحي». النادي الأحمر واصل نزيف النقاط بخسارة فماتش قاصح اليوم الخميس، ضد نهضة بركان، بجوج لواحد في المباراة اللي تلعبات بالملعب البلدي ببركان. خاد النتيحة هي الثانية الخايبة منذ استئناف بطولة المحترفين اللي كانت توقفات 4 اشهر بسباب الجايحة كورونا ڤيروس. الماتش الاول لحمرا كان ضد مولودية وجدة وسالى تعادل فكازا.

الوداد عانات فهاد الماتش. تطرد ليهم يحيى جبران فالدقيقة 31. المدرب الصبليوني خوان كارلوس گاريدو حصل ولقى راسو مضطر يدير تغييرات كثيرة خاصة فالدفاع. حتى الصخرة الايفواري الشيخ إبراهيم كومارا، بدلو فالشوط الاول بعد ما تصاب.

فهاد الماتش اللعابة دالحمرا كانو منرفزين بزاف. خلاهم ياخدو حمرا وحدة وبزافت الصفرات.

المدرب ما كانش عندو باش يبدل. حصل. الوداد كان رابحة وصدقات متعادلة ويزيدو الثاني من بيلانتي.

بركان ولات الثانية مع الراجا والوداد مازال هي الاولى ب37 نقطة. غير نقطة وحدة تكفي الراجا فماتش اسفي السبت اللي جاي باش تولي مع الوداد فالصدارة.

تدبير كارثي يتحمل مسؤوليتو الرئيس سعيد الناصري. حروب خاوية دخل فيها وخلى الفرقة. النتيجة هاد الشي اللي واقع