عفراء علوي محمدي- كود//

قرر وزير الداخلية، عبد الوافي الفتيت، إعفاء عامل عمالة مقاطعات الدار البيضاء -أنفا من المهام ديالو. 

وحسب بلاغ لوزارة الداخلية، فهذ القرار جا بسبب سوء تدبير العامل لملف المحافظة على التراث التاريخي والمعماري لمدينة كازا.

وجا هذ القرار بعدما تم هدم فيلا موفييلي اللي كتواجد فتقاطع شارع أنفا مع شارع الزرقطوني، بالإضافة لاقتلاع أشجار نخيل كيوصل عمرها لمئات السنين، والسماح بتغيير اسم سينما ريالطو التاريخية وتحويلها لمسرح المغرب والترخيص لسواعدة MBC5 باستغلالها.

وبالنسبة لبعض المراقبين، فمجلس مدينة كازا كيتحمل بدورو المسؤولية فهذشي اللي وقع، خصوصا وأن تخريب تراث كازا وتشويه معالمو مانحصرش فقط فمنطقة أنفا، بل حتى فمناطق أخرى، بحال درب السلطان اللي تم السماح فيه بعرض السنيما الملكي للبيع، وتحويلو بالتالي لقيسارية دالحوايج، لكونو جا وسط سوق الجميعة.