كود هناء ابو علي ///

دابا قرار الحكومة على فتح الحدود او عودة لمغاربة اللي حصلو برا ومعاهم اللي من اصول مغاربة والمقيمين فبلادنا قرار غبي بكل المقاييس.
هما كيف قال وزير من الحكومة ل”كود” دايرينها غير للمغاربة باش يجيو يعيدو مع عائلاتهم.

بيان الحكومة قال هاد الشي “للمواطنين المغاربة والمقيمين الأجانب بالمملكة وكذا عائلاتهم” هما اللي يقدرو يدخلو ل”التراب الوطني ابتداء من 14 يوليوز 2020 ( عند منتصف الليل) عبر نقط العبور الجوية والبحرية”. وباللي خاص جوج تسيت دايرهم 48 ساعة قبل ما تطلع للطيارة.

هاد الشي كولو فشي شكل. هي فالحقيقة غير عملية عودة لمغاربة اللي حصلو فالخاريج وما جابتهمش الدولة فرحلاتها دابا كتقول ليهم بغيتو دخلو جيو ولكن كلشي على حسابكم. طيارة وتيست غادي يسوى شي الف درهم او ما فوق وزيد وزيد

ثم هاد شركات الطيران كيف غادية دير. مصدر من وحدة من هاد الشركات قال ل”كود” باللي هاد الشي مكلف. المصدر اضاف ل”كود” “دابا واش الثمن غادي يبقى بحال بحال ولا غادي يتزاد. حقاش لارام او العربية مثلا غادية تمشي خاوية من المغرب باش تقدر تجيب مثلا مغاربة من باريس او من بلاصة اخرى ولا كانو هاد لمغاربة ولا المقيمين فالمغرب مقطعين فشركة بحال اير فرانس فراها غادية تجي عامرة ولكن غادية ترجع خاوية”

زيد على هاد الشي كولو ما عارفينش كيفاش غادية تصرف حكومة الصبليون. هاد الحكومة كانت قالت باللي حدودها البرية من سبتة ومليلية ولا البحرية غادية تبقى مسدودة مع المغرب حتى اخر الشهر لكن واش المطارات ديال هاد البلد غادي يفنج حدودو.