عفرءا علوي محمدي- كود//

جاو تحديدا 313 لمغربي كانو حاصلين فتركيا، على متن 3 طيارات حطاتهم فمطار “سانية الرمل” فتطوان، بعدما بقاو حاصلين لأزيد من ثلاث شهور فتركيا، بسبب تعليق الرحلات الجوية والبحرية من إلى المغرب فهذ فترة الطوارئ الصحية اللي فرضها فيروس كورونا المستجد.

هذ الطيارات هزو مغاربة كانو حاصلين فمدن مختلفة فتركيا من مطار اسطنبول، وجابوهم لبارح الثلاثاء للمغرب، باش يدوزو 9 أيام ديال الحجر الصحي ففنادق كاينين فساحل “تامودة باي”، فعمالة إقليم المضيق-الفنيدق.

واليوم الأربعاء، غادي يديرو مغاربة تركيا التيست على فيروس كورونا المستجد (كوفيد-19)، باش يعرفو واش تصابو بيه فتركيا أو لا، وباش يتم معالجة الناس اللي مقيوسين بمنحى استعجالي، وفقا للبروتوكول ديال وزارة الصحة الجاري بيه العمل.

وللإشارة، فالحد الساعة جاو المغاربة الحاصلين برا من الجزائر، اسبانيا، جزر الكناري، وتركيا، ومازال غيجي الدور فالأسابيع القادمة على فرانسا وبعد الدول الإفريقية ودول الخليج، كيف كان صرح قبل وزير الخارجية.