كود اسماء غربي ////

المتخلف اللي عطاوه اللجنة الخاصة بالمشروع التنموي شكيب بنموسى قودها مزيان ماشي باش تلاقى مع سفيرة فرانسا فالرباط ايلين دوگال وقالت فتدوينة باللي جا عندها بنموسى وقدم ليها تقرير على فاش وصل عمل اللجنة. هادي باينة ماشي منطقية. حقاش ما مشاش عندها ودار معاها بفيزيوكونفيرانس وتدوينة السفيرة فيها عجرفة وتكبر. باش قالت باللي جا عندي بنموسى وعطاني تقرير على فين وصلات اللجنة. اللي منطقي انه هدر معاها وصافي.

بنموسى قودها باش خرج رد عليها اولا. علاش ترد عليها. هي كان خاصها تصحح تدوينتها. ما بغاتش مشكلتها. ثانيا علاش خرج كيرد عليها بالفرنسية. واش هاد بنموسى اللي باغي يكتب تقرير علي المشروع التنموي عندو جهل بالبلاد لهاد الدرجة.

راه اللي نتاقد وحتج كل واحد وخلفياتو. كاين اللي ما باغيش اللجنة وما باغيش لبلاد تزيد القدام وكاين اللي ضد الهيمنة ديال فئة من هاد اللجنة فرنكفونيين وكاين اللي ضد فرانسا ولقاها فرصة يصفي حساباتو معاها.

ولكن النقاش الكبير بالعربية. علاش يا بنادم مشيتي كتهدر بالفرنسية. فيه احتقار لهادوك اللي عبرو على افكارهم. ايلى بغيتي ترد عليها راك غير كتخربق. هادوك اللي طالبو يحيدوك حقاش شعرو بالاهانة كمغاربة ما قستيهمش. شفتي يا الذكي بزاف