كود اسماء غربي ///
شوفو شكون اللي كيسب الممثل رفيق بوبكر. محمد الخياري. اييه الخياري كيهدر باسم الفنانين. اييه دار تدوينة كيقول فيها بوقاحة وحقارة “الجسم الفني بريء اتم البراءة مما فعله هذا الامعة في دين الله والائمة وبريء من من كانو معه الذين ذكرت اسماءهم وفاه بها من جرى النفايات =فمه العكر=
اييه هادا الخياري. بزاف عليك يا الخياري انك تهدر باسم الفنانين. ما عندكش اولا الصفة. هاداك التلحميس ديالك ولحيس الكابة وتقديم راسك باللي فنان خليه عندك.
رفيق بوبكر فنان عليك. مبدع عليك. اكثر من هاد الشي. كان يكون اغنى منك ويتحرك فالحديد الواعر وساكن ففيلات ولكن ما بغاش يدير بحالك. عندو كرامة. عندو كبرياء الفنان. ما عمر بوبكر رفيق يطلب شي مخرج ولا يتصل بشي شركة او مؤسسة عمومية باش يدير ليها الاشهار. انت يا اللي كيهدر بالاخلاق مورط ففضية باب دارنا اللي تم الاحتيال فيها على الاف المغاربة. متورط حقاش درتي اشهار لهاديك الشركة اللي طلع مولاها نصاب. قبلتي تاخد لفلوس بلا ما تتاكد كاي فنان واش هاد الشي كاين ولا اللا. هادي من خدمة الفنانين اللي كيقبلو يديرو الاشهار لمقاولات فالعالم كولو.
رفيق بوبكر يستحيل يتصل بمدير قناة او مدير الانتاج فالقنوات المغربية قبل رمضان باش يلقاو ليه دور. الدليل ان ادوارك نمطية. ابداعك ناقص بزاف. للي قدرتي عليه هو تجمع لفلوس. هاد الشي اللي نجحي فيه. شي فن اللي كيهدر باسمو الله يجيب.
نهار تولي تمثل بحال رفيق يمكن ليك تهدر ديك الساعة. تكون تكون باخلاقو. اييه عندو اخلاق. عندو انفة. عندو كبرياء. عندو الشجاعة يدير اللي كيبغي وما مسوقش لا لشعبية لا لامثالك.
علاش يا المجتهد ما قدرتيش تحل هاداك الفم ديالك وبزاف عليك تسمي فم الممثل وهو فالحراسة النظرية “مجرى النفايات”٬ نهار تسجل الممثل الكبير البشير السكيرج فطنجة وتشدو اللي سجلوه واللي سربو الفيديو ماشي الممثل.
قول لينا علاش. حقاش جبان. انت كتعرف بوبكر. كون عندك شوية الجرأة تسناه غير حتى يخرج ويكون قدامك وايلى كنتي شجاع سبو.
امثالك خارجين على الفن. علي الحريات. انت اصلا ما عمرك دافعتي الا على رزقك. ما عمرك درتي شي معركة حقوقية فقضايا كتهم حقوق الانسان والحريات والصحافة فالبلاد. عادي يخرج منك داك الشي
