عفراء علوي محمدي- كود//
تناقلو رواد مواقع التواصل الاجتماعي أخبار كيقولو فيها بللي السبيطار الجامعي محمد السادس فمراكش “الرازي” قرر باش يخلط المصابين بفيروس كورونا المستجد مع المخالطين والمرضى اللي مافيهمش الفيروس فجناح واحد، بسبب الاكتظاظ اللي عرف مؤخرا.
المعطيات اللي رايجة كتقول بللي مجموعة من الأطر الصحية كيوجدو مراسلة لوالي الجهة فهذ القضية، باش يستنكرو هذ الفعل، على اعتبار أنه كيشكل خطر كبير على صحتهم وصحة المرضى كاملين ديال السبيطار.
فحديث “كود” مع مدير السبيطار، لحسن البوخاني، على صحة هذ الهضرة اللي كتروج، قال بللي يستحيل تكون صحيحة: “أولا حيت مستشفى الرازي كبير وفيه طاقة استعابية ديال 360 سرير، وعليه مسؤولية علاج مرضى “كوفيد 19″ وماغاديش يدير أمور تساهم فانتشار العدوى وتشكل خطر على الأطر الصحية، وثانيا كاين عندنا فصل جغرافي بين السيركوي المخصص للمصابين بكورونا والسيركوي ديال باقي المرضى، وهذشي اللي مديور فكَاع السبيطارات فالعالم”.
بالنسبة للمخالطين، أكد مدير السبيطار بللي “الرازي” ماكيتكلفش بيهم، وبللي أغلبهم كيديرو الحجر الصحي فأوطيل فمراكش على ما يخرجو ليهم النتائج، كيقول البوخاني “حنا ماعندناش المخالطين، أوطيل قصبة موكَادور هو اللي كيتكلف بيهم، حتى الاستراتيجي ديال الديبيسطاج كتدار فالمديرية الجهوية للصحة، والفريق الصحي ديالنا ماكايخرجش فالديبيسطاج”.
وكيمكن يجيب السييطار حالات قليلة مشكوك فيها تدوز الحجر الصحي على ما يبانو نتائج التحاليل اللي دارت دكورونا فالسبيطار وهذ الحالات القليلة كتحط فشومبرات ديالهم بوحدهم، وكتكون معزولة، كيف قال البوخاني.
ومانكرش البوخاني بللي سبيطار “الرازي” مؤخرا عرف واحد الاكتظاظ طفيف “كاين روبريز ديال ليزاكتيفيتي ديالنا، ولينا نستقبلو مرضى كثار مافيهمش “كوفيد 19″، منهم خصوصا مرضى القلب، واللي عندهم “أمراض شرعية”، وهذشي كايكون ديما مع كل رمضان كيزورونا مرضى كثار”.
