كود اسماء غربي ////
هاد السيمانا دار حميد عدو الرئيس المدير العام ل “لارام” رسالة لكاع ناس الشركة كيهدر فيها على كيفاش كتعيش هاد الازمة واش من افاق عندها باش تخرج منها. “كود” خرجنا هاد الرسالة البارح.
تشاؤل وطلب من كلشي يزير السمطة. هدرنا البارح على اللي كان من الممكن يديروه ليبيلوط اللي كاين فيهم اللي كيتخلص 15 مليون شهريا وكاين اللي قلبها فيرمات ودايرين الدجاج. شي وحدين منهم هدرو ل”كود” على مصاريف اخرى كان هاد المدير خاصو يديرها. هاد الشي اكداتو مصادر ل”كود” من فروع فهاد الشركة برا.
هاد المدير اللي كيهدر على انقاذ الشركة وعلى انها كتخسر يوميا 50 مليون درهم وباللي خاص 3 سنين باش تگعد نسى انو هو لعب دور باش يزيد يغرقها.
شوفو هاد المصاريف لكثيرة بزاف اللي هالكة الشركة ودارها محاباة ماشي لناس عندهم كفاءة.
باش جا هاد عدو حيد ممثلة لارام فامريكا اسمها اسماء الحسوني. كانت بوحدها وكانت خدامة مزيان. السي المدير وفق مصدر “كود”٬ جاب الفارسي امين اللي كان عاقبو بنهيمة وحطو فالكاراج. داز للشحن وهاد الشي ما خدم والو بل خرج على “لارام” ففلوس كثيرة باش رجع طائرة بوينگ 767 كارگو تنقل السلعة. باش تولي جاهزة خسرات لارام 250 مليون درهم تقريبا ومن بعد ما خدماتش وزادت خسائر لارام السنوية.
القصة ما بقاش هنا. عدو عين صاحبو اللي عندو اولاد وعائلة طبعا فنيويورك وعطاه يتكلف بكاع رحلات امريكا: نيويورك وواشنطن وبوسطن وميامي وزاد عليهم ساو باولو وريو ديجانيرو. هاد السيد كارية ليه لارام دار فيها 4 لبيوت فنيويورك وولادو كيقراو فالمدرسة البريطانية وحدة من اغلى المدارس تماك. يعني كيطلع على الشركة اغلى باش كيطلع لا رئيس الحكومة ومعاه وزيرة النقل الجوي والسياحة الوصية على القطاع.
مصدر ف”لارام” قال ل”كود” باللي هاد لقراية ديال ولادو كتخلص فيها الشركة مائة مليون فالعام.
كانت اسماء الحسوني كتخدم وطالعة فابور على الشركة وهادا جا غرقها.
عدو رسل معاه ولد وزير يالله دخل للشركة. باش حتى هو يتمتع. دابا هاد السيد دار مديرية كبيرة باش يبين خدام. عدو رسل وحدة كانت لميامي واسمها البوري. كتخدم من دارها واخا عندها مكتب وخاص الشركة تكري ليها. فلوس صحيحة. وزاد وحدين خراين تضيف مصادر “كود”.
هادا اللي كيبكي على الشركة عارف ان نسبة الملء لميامي وبوسطون ما كتوصلش 25 بالمائة. يعني مدير على بلاصة فاشلة تجاريا ولكن مصاريف هادو كتهلك الشركة
عدو وفق مصدر اخر ل”كود” داير خطوط فاشلة كتخسر فيها “لارام”. اثينا اللي فيه جوج رحلات فالاسبوع بعض المرات كيدير رحلة وحدة. اش دار باطرون الشركة؟ رسل ليها وحدة اسمها الخديري بولادها. كاري ليها فيلا وخاصو يخلص قراية هاد لولاد. نفس التخربيقة دارها٬ تضيف مصادر “كود”٬ مع شي وحدة بيسطوني رسلها لفيينا اللي عندنا فيها رحلة فالاسبوع. خط فاشل ما كيغطيش حتى مصاريفو،
اما شي وحدة من معارفو واقاربو فرسلها ل”ليون” بلا ما نهدرو على خطوط كبيرة وشكون كياخدهم وكيفاش الكفاءة اخر حاجة كيفكر فيها.
هاد الشي راه غادي يبان فتقرير المجلس الاعلى للحسابات. هادي 3 اشهر وهو فالشركة. نشوفو واش غادي يجبد هاد لفضايح ولا غادي يسكت عليها وتكون فضيحة كبيرة
الشركة باش تقلع خاص يجي شي مسؤول فيدو. عدو غادي بيها ماشي للحيط. غادي بيها باش تولي فخبر كان.
