عفراء علوي محمدي- كود//

حذرات الفيديرالية البيمهنية لقطاع الدواجن والجمعية الوطنية لمنتجي لحوم الدواجن المستهلكين من شراء الدجاج البلدي من ماركة “Vot’santé”، على اعتبار أنها غير قانونية ومامعترفش بيها.

الفيديرالية كشفات، فبلاغ ليها توصلات بيه “كود”، بللي ماتمش المصادقة عليها باش تنتج الدجاج البلدي أو “دجاج المزرعة”، وبالتالي فهذ كتخالف المادتين 37 و 38 من القانون رقم 06-25 المتعلق بالعلامات المميزة للمنشأ والجودة للمواد الغذائية والمنتوجات الفلاحية والبحرية.

وأدانت الفيديرالية هذشي اللي وصفوه ب”الممارسات الاحتيالية” لتضليل المستهلك بشأن مواصفات الدجاج اللي كتسوقو هذ الماركة، وطالبو المكتب الوطني للسلامة الصحية والمنتجات الغذائية باش يطبق القانون فهذ المجال.

وأكدات الفيدرالية بللي كتحتفظ بحقها فمتابعة هذ الشركة والمسير ديالها من اجل انتحال علامة الجودة الفلاحية والتحايل بخصوص طبيعة المنتوجات.