عفراء علوي محمدي- كود//
مجموعة من مواطنين فكازا كيتشكاو فهذ الفترة دالحجر الصحي من عدم احترام الخضارة للأثمنة اللي كتحدداها الجماعة ديال سوق الخضرة والفواكه، وعوض ما يكون هامش الربح ديالهم معقول استنادا للأثمنة دالكَرو اللي عالنة عليها الجماعة، الخضارة زايدين فيه شوية، بحجة أنهم حتى هوما خداو الخضرة والفواكه بالجملة بثمن طالع، وماعندهم ربح.
لافوكا اللي نورمالمون كتدير فالجملو 28 درهم للكيلو، حسب آخر بلاغ أسبوعي ديال جماعة مدينة كازا، كيبيعوها صحاب الفواكه ب8 دراهم حتى ل10 دراهم للحبة، على اعتبار أنهم خادوها من سوق الجملة ب40 درهم للكيلو وكثر.
كود بحثات فين كاين المشكل، وتكلمات مع رئيس جمعية التضامن لسوق الجملة، رشيد العامري، اللي أكد ليها بللي طبيعي الثمن دالمواد الفلاحية بالجملة يكون مرتفع على داكشي اللي محدداه الجماعة، على اعتبار أن الخضرة والفواكه كيدوزو من مراحل كثيرة قبل ما يجيو فيد الخضار، وكايبيعهم أشخاص كثار، وكل واحد كيضمن الهامش دالربح ديالو، على حساب الظروف والسياقات.
وحاجة خرى كتخلي الخضرة تكون طالعة ولا نازلة فالثمن، هي الكمية ديالها فسوق الجملة، “فإلى مثلا دخلو 10 كاميوات ديال ماطيشا للسوق، وكانت ماطيشة كتدير 3 دراهم، فطبيعي الثمن غايطلع حيت الطلب كيكون كثر، وأي مادة كتغلى بمجرد ما كانو زبناءها كثار فالمارشي”، على حساب كلامو.
بالنسبة للافوكا، كيقول العامري بللي كتباع فالمارشي ب30 حتى ل35 للكيلو “حيت عليها الطلب بزاف، وكتولي قليلة فالسوق، والسقاط كيولي يشريها بشحال ما كانت باش يحطها فالطابلة ديالو، وبالتالي كيزيد على الكليان”.
وبخصوص الخضرة والفواكه النادرة، فالجماعة ماكتحددش ثمنها دابا حيت كتكون متوفرة بكمية قليلة ويقدر يكون ثمنها غالي بزاف، ومازال ماكتكون جات للسوق “بحال السلاوي دابا يالاه بان، والناس اللي كيخدوه قلال، وحتى هو قليل شوية، وبالتالي ضروري يكون ثمنو مرتفع بالمفارنة مع الخضر الأخرى”، على حساب هضرتو.
وكاينة مسألة خرى كتخلي الخضرة تكون غالية، هي منين كيشريها الشناق وكيبيعها فسوق الجملة نيت، كتزاد عليه درهم، وهو باش يعوض الدرهم اللي تزاد عليه ويحقق هامش دالربح كيزبد 2 دراهم أو أكثر، وهذشي من سوق الجملة نيت.
و”كود” طرحات سؤال علاش الخضرة كتولي غلا من داكشي اللي حددات الجماعة فسوق الجملة فاتصالها بمدير السوق وواش كاينة مراقبة على الأثمنة، لكن ما تلقاتش جواب، بحيث كان ضروري الاتصال بموظفة بمجلس الجماعة لأخذ الإذن.
وفاتصال “كود” بالمكلفة المعنية اعتذرات، وقالت بللي ماخداتش “الأوكي” من الإدارة، بلا ما توضح الأسباب.
