كود سعيد الشاوي ///

خاص الدولة تريكيزيسيوني شركات النسيج ففرانسا. هادا هو خطاب جون لوك ميلانشون زعيم اليسار الراديكالي ففرانسا. هاد السياسي هدر جوج مرات فحوارو اللي كاين هاد الصباح الاحد 19 ابريل 2020 على قناة “بي اف ام تي في” الاخبارية الفرنسية على المغرب.

ميلانشون عطى عبرة بالمغرب للرئيس الفرنسي ايمانويل ماكرون فقضية الماسكات٬ وقال “علاش ما نستافدوش من المغرب اللي كينتج 3 مليون ماسك فالنهار وحنا ما قادرينش”. طبعا ميلانشون عندو لخبار قديمة راه ولينا كنتجو 5.7 مليون ماسك فالنهار.

زعيم اليسار الراديكالي الفرنسي رجع وعاود الموضوع وقال باللي كفرنسي كيحس براسو مهان باش كيشوف دولتو واقفة علي الصين باش تاخد الماسكات. مضاربة مع امريكا على هاد الشي فمطارات بيكين. ثم اضاف “نعطي مرة اخرى مثال بالمغرب اللي عزيز علي وفيه تولدت٬ معامل النسيج كتنتج عندو 3 مليون ماسك وفرانسا اللي عندها 2400 شركة نسيج ما قادرتاش تنتتج 42 مليون ماسك لناسها”.

هاد القضية ماشي اول فرنسي قالها. اليمين المتطرف صحاب مارين لوبان كانو هدرو على المغرب وعتابروه قدوة فقضية الماسكات. الجورنال الشهير “كانار اونشيني” كانت دارت مقال علي هاد الصناعة المغربية اللي كيخلي المغربي فرحان براسو

فاهمين انو لا يمين متطرف لا يسار راديكالي كيهدر على المغرب غير حب فيه. طبعا كيهدر عليه باش يضرب الرئيس الفرنسي باش يدير المعارضة. ماشي مهم ولكن الاساسي ان المغرب هاد المرة حاضر بالصناعة ماشي بشي حاجة اخرى