عفراء علوي محمدي- كود//

البوليس مازال كيقلبو على ربعة دالرجال تكرفصو على ميريكاني ومغربي بسباب فيروس كورونا وهربو، فواحد لوبيرج فمراكش.

وحسب مصدر قريب من الضحية الميريكاني، اللي سميتو آدم، وقع هذشي نهار 30 مارس، فاش كان هذ الأمريكي خرج من لوبيرج باش يمشي يتقضى شي حاجة دالماكلة ويشري شي دوا، بمجرد ما رجع للوطيل تبعوه، وضربو المغربي اللي كاين فالاستقبال ديال لوبيرج، وشدو الميريكاني وطيحوه فالأرض وهلكوه عصا وركل.

وفاش كانو هذ الأشخاص كيضربو آدم الميريكاني والريسيبسيونيست، كانو كيقولو بللي خايفين لا ينقل ليهم عدوى كورونا، وقالو من بعد بللي خاص كَاع الأجانب يرجعو لبلاداتهم.

من بعد هذشي، تقدمو الميريكاني والمغربي اللي خدام فلوبيرج بشكاية للبوليس، ودارو فحوصات طبية كتبين أنهم تعرضو للضرب فمختلف مناطق الجسد ديالهم، وخصوصا الريسيبسيونيست اللي جاتو الركلة فراسو، وبسباب هذشي هزوهم للصبيطار باش يتعالجو تماك شي يامات، وغير هذ لأسبوع خرجو من السبيطار.

وبدات كتوصل آدم والريسيبسيونيست مجموعة من التهديدات بمزيد من العنف، وعلى هذشي خواو البلاصة اللي فيها لوبيرج ومشاو سكنو فبلاصة أخرى، وحتى اللي تعداو عليهم خواو السيكتور، وهوما دابا روشيرشي.

وحسب مصدر “كود”، فهذ القضية مازال ما وصلات للسفارة الأمريكية، وآدم فكر مايقول والو ويثيق فقط فالبوليس ديال المغرب هوما اللي يجيبوليه حقو.