عفراء علوي محمدي- كود//

اليوم الاثنين 17 فبراير، عرفات أسعار ليسونس والكَازوال نقصات بنسبة خفيفة فكَاع السطاسيونات ديال الوقود فالمغرب.

وقال جمال زريكم، رئيس الجامعة الوطنية لأرباب ومسيري ومهنيي محطات الوقود بالمغرب، بللي قيمة الانخفاظ تراوحات بين 38 و49 سنتيم للتر من الكَازوال، وبين36 و37 سنتيم للتر من ليسونس.

وكشف زريكم، فتصريحو ل”كود”، بللي أسعار الكَازوال وليسونس اختلفات من شركة لأخرى، “ف”طوطال” و”ففيفو” مثلا ثمن الكازوال نقص ب40 سنتيم للتر، وليسونس ب37 سنتيم للتر، وبالنسبة “لبيتروم”، فالانخفاض فثمن الكَازوال كان ب38 سنتيم للتر، وفليسونس ب36 سنتيم للتر، وهذشي انطبق على شركات كثيرة أخرى”.

وأكد زريكم بللي صحاب السطاسيونات كَاع ما مسؤولين على الزيادة أو النقصان فالأثمنة، بل هذ التغييرات جايا من السوق العالمية، وضروري المغرب حتى هو خصو يمشي فهذ الاتجاه ويواكب أي تغيير.