كود احمد الطيب الرباط ///

المغرب دار بيان من صفقة القرن اللي قتارحاتها امريكا لحل الصراع الفلسطيني الاسرائيلي. الرباط دعمات مبادرات واشنطن. شد لعصا من الوسط. قال باللي خاص القدس تبقى ديال الديانات الثلاث. من بعد جات اخبار على صفقة اسرائيلية مغربية امريكية. فيها تعتارف امريكا بالسيادة المغربية على الصحراء فالمقابل دير الرباط سفارة فتل ابيب واسرائيل سفارة فالرباط ويلتقي الملك محمد السادس مع رئيس الوزراء الاسرائيلي بنيامين نتانياهو.

هنا الرباط غيرات لجهتها. اييه بوريطة قال باللي ما يمكنش شي حد يدافع على الفلسطينيين كثر من الفلسطينيين وقال باللي المملكة كتدعم دعما كاملا “للقضية الفلسطينية لإيجاد حل عادل ونهائي ينصف الشعب الفلسطيني”

طبعا االوزير المنتدب لدى وزير الشؤون الخارجية والتعاون الإفريقي والمغاربة المقيمين بالخارج، محسن الجزولي، في كلمة خلال الاجتماع الطارئ لمجلس الجامعة العربية على مستوى وزراء الخارجية العرب، قبل ايام بالقاهرة ذكر باللي الرباط تقدر الجهود البناءة للسلام التي تقدمت بها الإدارة الأمريكية من أجل التوصل الى حل دائم وعادل ومنصف لهذه القضية”.  

الرباط بدات استراتيجية اخرى فالتواصل. خلات الفلسطينيين يهدرو على المغرب على دورو ففلسطين. دخلات حتى حماس اللي ما عندناش معاها واتصل اسماعيل هنية برئيس الحكومة وهادا ديال حماس هدر علي دور الملك محمد السادس. هاد لكلام وظفو بوريطة بعد ما اثير الموضوع فمجلس المستشارين قبل يومين. 

من بعد نشرات وكالة المغرب العربي للانباء مقالات كثار فيها اشادة بدعم المغرب فدعم القدس والمسجد الاقصى والدفاع عن فلسطين. ها “اشادة عربية” بهاد الدور وباللي المغرب “كيخلص “كافة المساهمات المالية في صندوقي القدس والأقصى اللذين أقرتهما القمة العربية بالقاهره عام 2000 ويديرهما البنك الاسلامي للتنمية من أجل تنفيذ مشاريع لدعم التنمية في فلسطين”. بعد الدعم المالي هدرو علي الدعم السياسي. لاماب جابت تصريحات مسؤولين فلسطينيين ومستشار للرئيس الفلسطيني وتصريحات اخرى.

الدولة كتدعم كذلك مسيرة الاحد اللي جاي اللي دعات ليها جمعيات مساندة لفلسطين. الدعم واضح. الرباط معولة على مسيرة مليونية. حقاش بهاد الشي ممكن تقول لامريكا راه الشعب ضد صفقة القرن وما نقدروش نديرو شي حاجة ضدو. غادي يولي ارگيمون صحيح. طبعا الى كان العدد قليل فالمسيرة استراتيجية اخرى للرباط باش تتحرك. ولكن باش قال وزيرة الخارجية والتعاون البارح باللي كمواطن يشارك فالمسيرة راه رسالة لدعمها واخا اكيد بوريطة ما عمرو يشارك فهاد المسيرة. يكفي ان احزاب فالحكومة منها البي جي دي اللي منها رئيس الحكومة قال باللي غادي يشارك وكيعبأ ناسو باش تعرفو ان الدولة لاعبة بهاد الورقة