كود احمد الطيب ///

حصلت “كود” على معطيات بخصوص غياب عدول فطاراگونة باقليم كاطالونيا الاسبانية. وفق مصدر “كود” فان المصالح القنصلية ما عندها علاقة بهاد الفراغ واخا هي اللي فالواجهة.

اللي وقع وفق مصدر بوزارة العدل ل”كود” ان لعدول اللي كان تماك مشى لقنصلية طاراگونة دار اخطاء. طلبو منو يدخل بعد ما دوز غير شي اشهر. مصدر اخر ل”كود” قال باللي هاد السيد كان مسخن كتافو بشي معارف فالادارة العامة للامن الوطني. موحالش هادوك المسؤولين فراسهم باللي كان مستغل اسمهم كاع.

وفق مصدر “كود” بوزارة العدل فالخارجية كتبات للقنصل الجديد يدخل. هاد الاخير دابا راه 4 اشهر وهو رافض يدخل للمغرب وجاب معاه عائلتو. باغي يحرگ ويتنازل على خدمتو. غبي وصافي. حقاش عارف باللي امثالو ممنوع عليهم يبقاو فالدولة اللي مشاو ليها. دابا الخارجية مازال ما تحركاتش. واش غير المسطرة غادية ولا عندو شي حد معاونو. باش غادية تخبر السلطات الاسبانية غاديين يرحلوه وبزز وما يدوزش نهار واحد لا فاسبانيا ولا فالاتحاد الاوربي. هاد الشي ديال موظفي القنصليات والسفارات عندو تنظيم خاص. لعدول غادي يولي بلا خدمة فالمغرب حقاش غادي يتعاقب ومعرض للحبس كاع ويستحيل يبقى فاسبانيا.

وفق مصدر “كود” فان هاد الشي هو اللي خلى شوية المشاكل فهاد القنصلية بخصوص توثيق عقود الزواج. لحد الان يالله تقدمات شي 3 او 4 طلبات لتوثيق الزواج هاد الشي علاش طلبات منهم القنصلية يمشيو لبرشلونة.