كود مدريد ////

اليوم الثاني من الدورة 40 للمعرض الدولي للسياحة بمدريد “فيتور” 2010. المغرب دار رواق فيه 330 متر مربع. جماليا ما بيهمش. ماشي فولكوري فيه ليموتيف ديالنا ديال صناعتنا ديال ثقافتنا ولكن مقدمة فقالب عصري جديد. رواق دار اللي كيخدم. فيه مكاتب مخصصة للعارضين. بلاصتو زوينة وسط امريكا اللاتينية تقريبا بجوارو غير غامبيا والسينغال.

اسبانيا والعلاقة التاريخية اللغوية اللي كتجمعها مع امريكا اللاتينية غادية تخلي نسبة كبيرة من هادوك 250 الف زائر منتظر لهاد الحدث يدوزو ويشوفو الرواق المغربي.

التنشيط ديال الرواق شوية ناقص. فمناسبات بحال هادي خاصك تبعد على الفولكور ولا تقدمو بابداع معاصر. فهاد الشي تفوقات دول اخرى من امريكا للاتينية. بورفورمانس فنية دارت باش تسوق هاد الدول. فيها ثقافتها فيها رسائل للسياح. ايلى جيتو غاديين ترتاحو. غاديين تكونو احرار. دولة بحال الارجنتين دارت صور كثيرة باش تبيع البلاد غير من اكبر الصور اللي محطوطة هي ديال ميسي وجوجت للعابة معاه بقميص المنتخب تخادت الصورة من “كوبا اميريكا”.

بهاد الطريقة قدرات الدولة توظف اسطورة بحال ميسي بحال ما تخلص الحقوق. كاين اكثر من جوج لعابة فالصورة وبقميص المنتخب. الملكية الفكرية للصورة كتكون عند الدولة.  كاين صور لحسنوات ديال الكارنفال فدول كثيرة فامريكا اللاتنية. لباس زوين شفاف كاين فيه حتى الجرأة. 

هاد الشي ناقص المغرب. هاديك القضية ديال راه السياح كيلقاو الشمس والبحر والجبل ما بقاتش كافية. الدليل هو ان بلاد قريبة لينا بزاف بحال اسبانيا يالله كيجيونا 2.5 مليون سائح. كون كانت عندنا سياحة ما يحسش السائح بحريتو بطريقة لباسو بتنقلو محدودة وكاين عروض غير كتشبه لعروض بلادو وعرض متكامل واحتيال قليل مع التعامل مع السياح… كان من السهل بزاف نجيبو علي الاقل 6 المليون سائح اسباني فالعام عوض 2.5 مليون اللي كتجي واللي فيهم زماكرية مغاربة عندهم الجنسية. بلاد فيها 40 مليون سائح وبيناتنا غير نص ساعة فالباطو صعيب تتصور يالله كيجيوك هاد العدد من السياح. 

السياحة كتاثر طبعا بعوالم بحال الارهاب. ايلى ضرب تونس لا مصر كينقص عدد السياح. ولكن حنا خاص يكون عندنا وضوح فاختياراتنا المجتعية الكبيرة. اش من مجتمع باغيين واش من حرية كنشدو. فيها غادي يكون تأثير كبير على السياحة.

يمكن الوزيرة الجديدة للسياحة مادية فتاح مع مدير المكتب الوطني للسياحة عادل الفقير اللي كيهدرو نفس اللغة٬ يديرو شي حاجة. اول تحدي قبل التحدي المجتمعي واش من بلاد بغينا اللي ما عندهم بيه علاقة٬ عندهم تحدي اخر هو كيفاش يواجهو مافيات القطاع اللي ولفو التسيب ولفو يقولبو السائح المحلي والاجنبي