كود احمد الطيب الرباط ///
علمت “كود” ان بنعرفة باش طلع لائحة الوزراء ديال حكومتو للقصر سولوه على جوج وزراء لا غير: عبد الكريم بنعتيق الوزير المنتدب المكلف بالجالية ومصطفى الخلفي الوزير المنتدب المكلف بالعلاقات مع البرلمان والمجتمع المدني والناطق الرسمي باسم الحكومة. الاول اتحادي والثاني من البي جي دي.
هادو بجوج قولبوهم الامناء العامون ديال احزابهم. بنعتيق ما بغاش ادريس لشكر يبقى فالحكومة. هاد السيد كذب على لمغاربة وقال ف”دوزيم” عند عبد الله ترابي فبرنامجو “حديث مع الصحافة” ان الحزب ايلى ما احتافظش بنفس الحقائب ممكن يغير اسماء الوزراء. اي كان يقصد ايلى ما بقاتش الوظيفة العمومية والجالية عندنا غاديين نبدلو بنعبد القادر وبنعتيق. فالاخير شفنا انو قدم اقتراح باسمو باش يولي وزير العدل اللي دافع ياخدها الحزب وباش رفضوه وفارتباك واضح ولا تقوليب جاب واحد ما عندو علاقة بقطاع العدل واللي ممكن يتحكم فيه وللي كان وزير اللي هو بنعبد القادر.
لشكر خايف من بنعتيق لذا دار كلشي باش ينحيه. اكيد غادي ياخد منصب مزيان
الثاني هو مصطفى الخلفي. هادا قولبو رئيس الحكومة الامين العام لحزبو. الفوق بغاوه يبقى فالحكومة. اكيد احسن بكثير من وزراء فحزبو فهاد الحكومة ولكن ضربوه لانو الوزير الوحيد اللي كان مع ولاية ثالثة لبنكيران. يمكن هاداك الكسكسو اللي كياكلو عند رئيس الحكومة السابق كل جمعة تقريبا بحي الليمون خرجات عليه.
حتى هو ممكن ياخد شي منصب
