نجوى المالحي-كود//
نايض صداع حقيقي بين الفنانة أمينة كرم لي تشهرات كأول مغربية في قناة “طيور الجنة” لي كتدوز رسوم متحركة ديال الكلاخ للدراري الصغار، وبين جمهورها والمتتبعين ديالها بعدما ختارت تحيد الفولار.
المتتبعين كيبغيو يدخلو جنب مع الواحد ويتحكمو ليه فحياتو ويتدخلو ليه فاختياراتو فقط لانه مشهور ومتبعينو. وهادشي خلا بزاف يعايروها وهي تجاوبهم ببوسط طويل عريض أكدات فيه أن حتى واحد ماسوقو فاختياراتها وهي حرة دير أو تحيد الفولار، حيت هادي امور خاصة بها.
كرم لي يالله عندها غير 19 العام قالت أنها كتخطأ وكتعلم لكن حريتها مايمكنش شي واحد يتحكم ليها فيها.
وحاليا أمينة دخلات عالم البيزنس وخرجات ريحة اسمها “سحر” هداتها لجميع المغربيات وبدات دابا مرحلة التسويق.
