كود كازا///
المجلس الاعلى للحسابات خاصو يتحرك فواحد لفضيحة كبيرة فبيت البام.
حزب البام اللي كياخذ لفلوس من وزارة الداخلية باش يسير راسو، ناض مشا الامين العام باغي يستعملهوم فحربه ضد اعداؤه داخل الحزب، وكتب شي مقال عندو سمية داعشية”طريق الانبعاث”، وبدا كيصيفطو للجرائد والمواقع ينشروه.
الغريب فهاد الأمر حسب مصادر “كود”، أن بنشماش كيصيفط للجرائد هاد المقال باش ينشروه كمقال اشهاري، وكيحجز اربع صفحات فالجريدة، وهادشي كيكلف بزاف، وهاد لفلوس كلها من مالية الحزب.
وحسب مصادر “كود”، أن بنشماش كيحاول استمالة الجرائد بهاد المقال الاشهاري، وكيحاول يصايب علاقته السيئة مع الصحافة بعد محاولته الزج بأربعة صحافيين في السجن، وهادشي كولو غير باش يهاجم اعداؤه في الحزب عبر الاعلام، ولكن تضيف ذات المصادر :” الجرائد اللي قبلات الاشهار ماغاديش تبدل توجهها المحايد، غادي تبقى تنشر لكل الاطراف ومايمكنش تبيع راسها من أجل الاشهار”.
دابا هذا كيهز من فلوس البام لي جايا من المال العام وكيصرف منها على نشر مقال تافه، هادشي باش يخدم مصالحه الشخصية، واش غادي ينوض المجلس الاعلى للحسابات ويد خلف هاد لفضيحة أو غايدير عين ميكة بحال هادو ماشي مال عام؟.
