هناء ابو علي-كود//

نشرات بزاف من المواقع خبر عن ان وزيرة العدل الاسرائيلية قالت ف تصريح ف مؤتمر خاص بالايباك ان المغاربة حمقى  وهمج و خصهم يموتو و كايستحقو الموت ، و ان اسرائيل كتدرس كيفاش تدمر دولة المغرب و الجزائر و تونس.

الخبر كايبان من طينة “فايك نيوز”  اللي كايخترعها شي مراهق ف شي صفحة ف الفايسبوك و لكن نشراتو بزاف من المواقع الاخبارية و قلنا انه ربما  غير مستعبد حيث الوزيرة اياها تنتمي لحزب يميني متطرف  و سبق ليها قالت كلام عنصري ضد العرب و المسلمين..

هاد الخبر سولات كود وزير الخارجية  ناصر بوريطة عليه فقال انه يستبعد ان تصدر مثل هاد التصريحات العجيبة و انه يجب التريث و التأكد.

و بالفعل بحثات كود على  واش كاين شي حس من هاد الخبار ف  موقع الايباك وهو تجمع مساندي اسرائيل ف ميريكان ومالقينا والو،  و بحثنا ف مواقع اسرائيلية ناطقة بالانجليزية و العربية والو،الخبر موجود غير  مواقع عربية و بالخصوص الجزائرية..

كود راسلات وزارة الخارجية د اسرائيل و  ايضا وزارة العدل تما باش نشوفو واش هادشي بصح، وفي انتظار جواب رسمي  منهم بحثنا عن اول موقع نشر الخبر لقيناه موقع عربي 21 اللي كايتقال عليه انه ممول من قطر و قريب من جماعة الاخوان المسلمين و لكن هاد الموقع كاينسب ف المقالة ديالو كلشي لموقع من غزة سميتو غزة الان و العجيب ان هاد الموقع براسو مسح الخبر  غير  ف الساعات الاخيرة كما كايبان من الرابط.

يعني بالواضح انه خبر كاذب و  هاد الموقع التابع لحركة حماس بعدما نشر هاد الخبر الكاذب و نشروه كاع المواقع العربية و استغلتو المواقع الاخبارية الجزائرية الرسمية باش تغطي على ازمة النظام الجزائري و تزكي نظرية التهديد الخارجي و المؤامرات الى اخره.. عاد مسحو؟