29/04/2024 12:00
مؤثر صبليوني لاح الهضرة للي ولاو دايرين كتائب إلكترونية وكيحذرو الإنفلونسر والسياح من السفر للمغرب.. قاليهم: حيدو الأفكار المسبقة.. ف المغرب حسيت بالأمان والناس ظريفين وعندهم حسن الضيافة
كود هناء ابو علي ////
اسماء السفراء اللي عينهم الملك محمد السادس فالمجلس الوزاري بمراكش البارح كانت هي المرة الثانية اللي كيختار فيها وزير الخارجية والتعاون ناصر بوريطة للسفراء. مرة ثانية ثقب ليها العين وبين باللي ما كاينش الفرق بينو وبين الفعفاع او غيرو.
اولا نشوفو التعيينات. اختار أحمد رحو، سفيرا لصاحب للمغرب لدى الاتحاد الأوروبي. طبعا اللي كيعرف رحو كيعرف باللي ماشي بوريطة اللي ختارو. السيد كان مرشح يكون وزير للمالية او رئيسا للبنك الشعبي او باطرون لصندوق الايداع والتدبير. يعني كاليبر كبير وكبير على بوريطة انو يعينو او يختارو. البارح كاين جوج تعيينات سياسية حزبية. الاتحادي حسن طارق سفيرا للمغرب في تونس وهادي مفاجئة فرحو ليه صحابو. التعيين الثاني للبامي كان عبد الرحيم عثمون سفيرا للمغرب في بولونيا. هادي غير تخربيقة وصافي. بولونيا وعلاش وكيفاش. ثم واش هاد البام هما اللي كيحكمو فهاد لبلاد. غير هما اللي كيعينو ديما فمناصب السفرا.
فالتعيينات السياسية ما كاين حتى شي حد من العدالة والتنمية ولا باقي الاحزاب. باينة الخارجية ندمات حتى على رضى بنخلدون اللي تم تعيينو فماليزيا.
بوريطة ما عينيش او ما قالوش ليه يعين احزاب اخرى. اجيو نشوفو التعيينات الاخرى اللي ديال الخارجية. هاد التعيينات كانت كما يلي محمد البصري، سفيرا لصاحب الجلالة لدى مملكة الأراضي المنخفضة (هولاندا). كان مكلف بالشؤون القنصلية فوزارة الخارجية
مصطفي بنخويا سفيرا للمغرب في البحرين وهاكا كان فالشؤون العربية وإيمان واعديل، سفيرة المغرب لدى جمهورية غانا. هادي مفاجأة. كانت فغانا عمرها 38 عام وخدمات فالشؤون الافريقية. يوسف السلاوي حتى هو كان فالشؤون الافريقية وتعين سفير للمغرب فبوركينافاصو ثم عبد الفتاح اللبار، سفيرا للمغرب لدى الولايات المتحدة المكسيكية. تعطلو بزاف بزاف باش يتعين سفير. خلص ثمن كبير علاقتو مع وزير الخارجية محمد بنعيسى. خبير فالعلاقات مع العالم الاسبانوفوني وخدم كثير فالقنصليات اخرها قنصلية الخزيرات، قنصل اخر تم تعيينه سفيرا هو محمد اشكالو اللي كان ففرانكفورت وتم تعيينو سفيرا للمغرب في فنلندا
اش فهاد التعيينات؟ اول حاجة كتصدم هو الموقف من المرأة. الخارجية مع بوريطة كتكره المرأة. فين هي المناصفة فين هو الدستور. بوريطة كيكره النساء وما دار الا امرأة وحدة فسفارة دولة خرج منها السفير السابق بفضيحة تحرش كبيرة.
الملاحظة اخرى ان سفارة بحال السويد بقات خاوية. كانت فيها امينة بوعياش ومللي تعينات رئيسة المجلس الوطني لحقوق الانسان بقى المنصب خاوي.
