كود هناء ابو علي ////

ايلى بغيتي تشوه حزب او تقضي عليه اختار منو غير الوزرا الضعاف. جيب ليه الضعاف وقدمهم. هاد لشي وقع مع حزب التقدم والاشتراكية. بغاو يتهناو منو. بغاو يقضيو على تحالفو مع العدالة والتنمية. جا الزلزال غير فالنقيلات ديالو: نبيل بنعبد الله وزير السكنى وسياسة المدينة والتعمير والحسين الوردي وزير الصحة وبعدهما جا التران فكاتبة الدولة فالما شرفات افيلال. يعني كاع وزراء الحزب تصاط فيهم. ماشي غير هاد الشي. باش تزيد تقضي عليه جيب اللي يعوضهم من اضعف طاقات هاد الحزب.

الفاسي عوض بنعبد الله وانس الدكالي عوض الوردي. لحد الان هما ما مصدقينش. ما مصدقينش حقاش ما فيدهمش. اليوم الهدرة غير على الدكالي. هاد الشي كيفرضو الحدث. دابا فالمغرب انفلونزا الخنازير قتلات 5 وممكن تزيد تفتك بالمغاربة. ماشي غير هاد الشي ولكن البسيكوز اللي دارتو فالمجتمع اخطر بكثير من الضحايا. مؤسسات تعليمية فكازا وغيرها تسدات تقريبا. الاباء ما بقاوش باغيين يرسلو ولادهم. شي شركات عاشت هاد البسيكوز بعد الشكوك فتسجيل شي اصابة. دارو ليهم ما يشبه الحجر الصحي.

المتهم فهاد الشي لحد الان وهادا جاي من عائلات الضحايا. زوج الضحية الاولى اللي من فاس واللي ماتت فمستشفى الشيخ خليفة بكازا ثم زوج ثانية بطنجة اللي مازال فالحياة دارو فيديوهات عطاو تصريحات كيتاهمو السبيطار ماشي غير بالاهمال ولكن بالتسبب فالاصابة ب”اتش 1 ان 1″. فهاد الجو الخايب يتم ترويج بزافت الفايك نيوز كيكون بزاف المعلومات اللي ماشي صحيحة. شكون اللي خاصو يكون فالواجهة يطمئن المغاربة؟ وزير الصحة. يعني هاداك الدكالي انس. اش كيدير هادا. ساد تلفون بكل وقاحة. ناسو فالتواصل ولا غيرهم ما كيهدروش. هادي غير البارح اللي رسلو اسماء بمن الصحافيين ممكن يتاصلو. مسؤولين على مستشفيات فمدن مغربية. شوفو الكلاخ كيف داير. هو عندو المسؤولية على القطاع وثانيا كاع لخبار كتجمع عندو مركزيا وهو اللي خاصو يتحاسب. باش ما يديرش الزبايل هاد الوزير الضعيف لاح الكورة عند مسؤولين اخرين ماشي سياسيين.
دابا هادي قضية وطنية ماشي قضية منطقة دون اخرى. خاص خطاب من الحكومة باش يطمئن لمغاربة.

ولكن وزير ضعيف فمستواه. يمكن كان منتهى حلمو شي نهار يكون مدير شي مديرية فشي مؤسسة حكومية٬ وطاح من الصقف وطلع وزير. عوض سيدو الوزير الوردي. تصورو كون كان دابا وزير. كيفاش دار معارك فقضايا اقل بكثير من هاد انفلونزا الخنازير كيفاش خرج للاعلام واجه ودافع. هادا ما باغي يدير والو.

لفضيحة ان المغرب ماشي جاه غير اش 1 ان 1″ وجاه حتى الحمى القلاعية اللي دايرة حالة فالعروبيات. لبگر كيموت ولا كيتصاب وفمناطق بحال سيدي بنور وخريبكة العامل حيد كاع الاسواق باش ما تنتاقلش العدوى. هادي فيها تداخل بين وزارتو وبين وزارتي الفلاحة والداخلية. لكن فهاد الوقت خطاب وزير الصحة هو اللي كيطمنئن اكثر. لكن فين هاد لوزير اللي يقدر يدير هاد الشي؟ اكيد ماشي هاد الدكالي اللي فالحقيقة جا باش يقولو راه حزب علي يعتة فيه الدكالي هو راس السوق. هاد الشي ماشي صحيح ولكن هادي هي الرسالة.