محمود الرگيبي گود العيون //
اللقاء التواصلي لي نظمتو الكتابة الجهوية لحزب العدالة والتنمية فمقرها فالعيون، داز فظروف سيئة بعدما توصلت عضو الأمانة العامة كاتبة الدولة المكلفة بالصناعة “جميلة مصلي” بخبر حزين بوفاة صديقتها، ولي هي زوجة أحد المستشارين فالديوان ديالها.
وحسب ماعينت “گود”، فقد كانت حالة من الحزن فاجتماع العيون، و”جميلة مصلي” باينة عليها التأثر بزاف وكتبكي وماقدراش تتنفس، ولكن الكتابة العامة والمنسق الجهوي محمد لمين ديدة رغموها على عقد الاجتماع لي مانافع بوالو، وحضراتو فئة وقيلة مافراسهاش القرارات لي كدير الأمانة العامة .
هذا وكانت حالة من الهيستيريا شدات المنسق الجهوي للحزب بجهة العيون ولي هو مستشار جهوي وديما كيطالب بتواجد الإعلام والصحافة فدورات الجهة، ودابا كيجري على الصحفيين الوطنيين بكلام قبيح ومن فوق هاد شي سد الباب بطريقة جنونية بذريعة هاد الاجتماع راه خاص !!!!
