كود هناء ابو علي الرباط ////

نايضة بزاف هاد ليام على برلمانية العدالة والتنمية أمنة ماء العينين. دارت الحدث ومشعلاها. صورتها حدا لومولان روج فباريس بلا درة دارت بزاف البارح. تدوينتها اللي كتبات فيها ان صور ديالها مفبركة كدور ما بدلات والو. هنا كاينة قضية واش الصحافة خاصها تنشر هاد الصور وهاد لخبار؟ طبعا. اييه خاصها تنشرو.

هادا خبار يستحق النشر. الزواية كل واحد وخطو التحريري. كاين اللي غادي ينشرها كببيبل وكاين اللي غادي يوظفها حقاش ضد افكار الحزب وكاين اللي غادية توصلو ويقول ما ننشرهاش كاع. كلهم عندهم الحق. هادي شخصية عمومية. مرا قافزة فالسياسة. من حزب محافظ اسلامي. صورة بلا درة راها سكوب. ما كنهدرش على واش صحيحة ولا اللا. هي كتقول مفبركة واللي نشرها كيقول صورة حقيقية. هي قالت غادية تمشي للقضاء. مزيان غاديين نعرفو واش صورة حقيقية ولا مفبركة. واش تصورات فغشت فبيگال فباريس ولا غير فوطوشوب دارتها تماك؟ هاد الشي غاديين نعرفوه.

قضية نشر الخبر فالصحف فالمواقع الاخبارية عادي. اللي كنختالفو فيه هو الرغبة فتدميرها الاصرار على تشويهها. السعي فتصوير حزبها بالصورة اللي كيصوروها شي وحدين. امنة ماء العينين ما عمرها كانت كتعطي الاخلاق لشي حد. عندها مواقف متنورة مقارنة بنساء حزبها. كانت عندها الجرأة وهي من هاد الحزب تطلق. قلبات على افاق اخرى. من حقها تحب. من حقها تعيش حياة جديدة. ممارسة الارهاب عليها على هاد الاختيار هادا ما خاصوش يكون.

التعاطف لكبير مع امنة ماء العينين من شعب اليسار بلا ما نهدرو على شعبها فالحزب٬ كيبين حاجة وحدة. اللي معول يشوه حزب العدالة والتنمية بقضايا اخلاقية خسر معركة الرأي العام. اللي كيدير هاد الشي راه كيدير اجزاء اخرى من مسلسل مسيرة ولد زروال. كلنا عارفين اش عطات المسيرة. كنعقلو ف”كود” نهار هاديك المسيرة الشهيرة قال عبد الاله بنكيران كان حينها امين عام لحزبو ورئيس للحكومة “صافي ما محتاجينش نديرو حملة انتخابية كاع”. كان عندو الحق وربحو 125 صوت.