كود الرباط//
اسامة لخليفي اشهر وجه فعشرين فبراير غادي ويقودها. دار تدوينة البارح خطيرة جدا. غادية تشرى ليه وصافي. يالله تفك من قضية وتقولب فاختياراتو السياسية كتب باللي كيتمنى الموت لكل قيادي فحزب العدالة والتنمية.
اكثر من ذلك زاد وهادي خطيرة بزاف بزاف باللي باغي يعلق رقابهم فشارع محمد الخامس فالرباط.
هاد الشي جا بعد الحكم على واحد فالحسيمة بعام دالحبس گال باغي يدبح رئيس الحكومة العثماني.
الخليفي كتب فتدوينتو: “بعد الحكم على من تمنى الموت للعثماني بدل السائحتان، أنا أتمنى الموت لكل قيادي في حزب العدالة والتنمية، لو كان ممكن سأعلق رقابهم بشارع محمد الخامس”.
غير باش تعقلو راه الغرفة الجنحية بالمحكمة الإبتدائية بالحسيمة، حكمات يوم امس الخميس 27 دجنبر 2018، بعام دالحبس وغرامة على الشاب اللي تمنى يذبح رئيس الحكومة سعد الدين العثماني. حطها حتى هو في صفحتو على الفايس.
