الرئيسية > آراء > علاش فينما دار المغرب شي حاجة تحمر لوجه تبدا الشكوك. اه التي جي ڤي غالي قبل ما يعرفو الثمن واش خاصك يا العريان وباش ربحنا الكاميرون اه حگى لقجع اه لاربيط ….
17/11/2018 19:00 آراء

علاش فينما دار المغرب شي حاجة تحمر لوجه تبدا الشكوك. اه التي جي ڤي غالي قبل ما يعرفو الثمن واش خاصك يا العريان وباش ربحنا الكاميرون اه حگى لقجع اه لاربيط ….

علاش فينما دار المغرب شي حاجة تحمر لوجه تبدا الشكوك. اه التي جي ڤي غالي قبل ما يعرفو الثمن واش خاصك يا العريان وباش ربحنا الكاميرون اه حگى لقجع اه لاربيط ….

كود هناء ابو علي /////

الكائن المغربي غريب الاطوار. اكيد كائنات اخرى عندها نفس الغرابة. لكن عندنا قدرة علي جلد الذات. احساس باللي كلشي مقود واقف. هاد ليام كانت غير لخبار لملاوطة اللي كدور. كارثة تدبير الحكومة للساعة الاضافية زادت ففقدان المغربي فالسياسة. زاد تأكد باللي بنعرفة اللي خدا الحكومة بدون استحقاق٬ كان رهان فاشل وخطأ ارتكبو المخزن. المهم كان النقاش لكبير والرفض الواسع لهاد الخطوة. لهاد الساعة اللي تسمات ساعة فرانسا.

خبر اخر خايب كان قبل الساعة. يتعلق الامر بفاجعة بولقنادل. تران تقلب وماتو7 وشكون تحاكم؟ الشيفور. كانت 12 عام تعطات للصحافي توفيق بوعشرين مدير نشر “اخبار اليوم” سابقا ومؤسسها فقضية غادية تبقى طاش خايب فعدالتنا. قبلها ضربو وحدة من اللي ما بقاتش “تشهد ضد بوعشرين” فقضية اخرى ب6 اشهر حبس. عطاو لناس حراك جرادة 5 سنين.

وسط هاد لخبار جات خبارات زوينة. بعد تأخير تم تدشين التي جي ڤي بين طنجة وكازا الخميس اللي فات وبعدها ب24 ساعة جات فرحة اخرى ربحنا الكاميرون فماتش الكورة. ما عمرها كانت فمسيرتنا. دازت 24 ساعة اخرى٬ وبعد ما خسرات مالاوي مع جزر القمر تأهل المغرب رسميا لنهائيات كأس افريقيا. شي مغاربة بغاونا نبقاو عايشين على الاحباطات. فاشلين. ما نجحو حتى فشي حاجة. اش بادو؟ شككو فهاد النجاحات.

هاد دعاة المغرب مقود فكلشي دارو حملة ضد التي جي في قبل ما يبدا. شي وحدين وصل بيهم توزيع اليأس لحد انهم روجو باللي التذكرة غالية قبل حتى ما يعلن ربيع لخليع مدير عام المكتب الوطني للسكك الحديدية البارح على اثمنة التذاكر. باش عرفو الثمن الرخيص وفاللي فالمتناول٬ ضربو الطم.

نفس العينة باش البارح ربح المغرب الكاميرون بجوج لزيرو بداو كيكتبو ويگولو. اه لقجع هو احسن لعاب فالماتش. الباركا فالغابون وحكمها. ماشي بيلانتي هاداك ديال بوفال ولاربيط حيد بيلانتي للكاميرون وطرد ليهم لعاب ظلما. ما بغاوش لمغاربة يتمتعو بهاد النصر. تجارتهم ديال التيئيس كتبور ايلى كان المغربي فرحان. ايلى المغربي دار شي حاجة مزيانة.

اولا المنتخب لعب مزيان البارح والبيلانتي ديال بوفال بيلانتي والاسود يستحقو. رئيس الجامعة فوزي لقجع داير خدمة مزيانة لا فالجامعة لا فالاتحاد الافريقي. عادي يدافع على مصالح بلادو. ويكون كاع كيدعم المنتخب راه الجزائر كانت ديما كتأهل وكتربح باش كان راوراوا نائب عيسى حياتو رئيس الاتحاد الافريقي لكرة القدم السابق. التوانسة والمصريين وزيد عليهم الكاميرون ونيجيريا كيحيحو فالماضي وحتى فالحاضر حقاش احسن من فراقي خراين فقط اللا. حقاش كاين فالاتحاد الافريقي ناس منهم كيدافعو عليهم بزاف بزاف.
شكون اللي عقل

على نصف نهاية كاس افريقيا بين المغرب والكاميرون ف1988 فمركب محمد الخامس فكازا. كاميروني خورو حسن لعور مدافع المنتخب ولاعب الرجا ضربو لاحو كوما وغيب لفترة. لاربيط ما شاف والو. بودربالة كلى لعصا اللي ما عمرو كلاها. تابعو واحد كيضربو وكيضربو وتگول واش لاربيط تحرك. ما ربحوناش بالكورة. ربحونا باللا كورة وبالتحكيم لعوج. سنين ولمغاربة كيعانيو من التحكيم الافريقي. دابا عاد بانت لهاد لمغاربة بيلانتي للكاميرون وطرد لهاد اللعاب او ذاك. كونو تحشمو وخليو لمغاربة يفرحو خاصة بعد احباطات متتالية. ما كرهناش نربحو كأس افريقيا والمورال يطلع كثر وتزاد فقصتكم

موضوعات أخرى

29/03/2024 09:50

ماتش الكوكب والحسنية.. تابعوه 20 ألف واحد وولاية أمن لمدينة لحمرا سخرات 1270 بوليسي وها شحال تشدو

29/03/2024 09:42

السينمائيون يهاجمون بنسعيد: كاين تراجع فالمكتسبات للي تحققات فحكومات سابقة وخاص حوار جاد ومسؤول باش نتجاوزو الأزمة

29/03/2024 09:15

الوداد طواو صفحة الناصيري وطلعو البرناكي كرئيس 20 فتاريخ النادي ودارو مليون للي بغا ينخرط

29/03/2024 09:00

علاش الاتحاد الأوروبي كيلعب لعب خايب مع المغرب وكيشكك فالسلع الفلاحية ديالو؟