كود يونس أفطيط///
البرلماني محمد أبرشان لي قالت عليه مجلة « جون أفريك » إمبراطور الريف، دار احتجاجات مصنوعة على مندوب الصيد البحري فالناظور، وجاب ليها الناس ديالو باش يوهم الرأي العام أن هاد المندوب ماصالحش، هادشي علاش، حقاش مندوب الصيد البحري ماجاش على هواه وماكايديرش ليه لي بغا وواقف ليه فحلقو.
أبرشان لي كانت ناضت عليه احتجاجات كبيرة فالريف وماقدر تا حد يوقفو عند حدو حتى العامل السابق لإقليم الناظور، مشا جمع رباعة ديال الشلاهبية وجابهوم دارو إحتجاج، واتهمو مندوب الصيد البحري أنه مشا خرب قوارب الصيد البحري، هادشي طبعا مكيدخلش للدماغ، وحسب مصادر كود، فمندوب الصحة بغا يطبق القانون بالنسبة للصبد الجائر وبالنسبة لعدد من الامور، وهادشي ماعجبش برلماني الاتحاد الاشتراكي لي هددوا وقاليه غادي يقدر يطيرو من بلاصتو، وناض هاد البرلماني لي مكيبغيه حد فالريف بسباب تسلطه ودار احتجاجات مدفوعة الاجر باش يضغط على وزارة الفلاحة والصيد البحري باش طير مندوب الصحة فالناظور.
