عمـر المزيـن – مكتب الرباط:

ولد واحد البوليسي متقاعد مروّن فاس الأيام بالتشرميل وكاين اللّي كيدير شكاية ديالو وكاين اللّي كيخاف منو. هاد المشرمل معروف لدى الرأي العام الفاسي بلقب “الهابي” وعندو عشرات البرقيات وروشيشي فقضايا إجرامية ومزال متشد.

وحسب مصادر مطلعة، لت”كود”، فإن “الهابي” متهم بترويج المخدرات الصلبة بين شباب العاصمة العلمية ودوّخ البوليس وكاين اللّي مكيعرفوش فالملاح ديالو كيفاش داير. حقاش السيد فوجهو باين ماشي مشرمل ولا يثير الانتباه.

“الهابي” كولشي كيقلب عليه وهو ديما فسيارات مختلفة مع صحابو واللّي بغا يبيع ليه شي حاجة كيجيها ليه سواء فطريق عين الشقف أو قرب تجزئة كاليفونيا اللّي كاينة فالمدخل ديال لمدينة. السيد ماشي غير كيبيع لغبرا والإسكتازي. فحسب مصادر “كود”، فإنه ارجع فنان فالتشرميل. هادي يومين واحد البنت في العشرينات من عمره وضعت شكاية ضده أمام مصالح الأمن، وتتهم بالاعتداء عليها بواسطة السلاح الأبيض.

وصرحت الضحية انها كانت فحي الدكارات وتعرض ليها بواحد السيارة وهزها صحّة لواحد الحي سكني تابع للبوليس “la cité” قرب القصر الملكي وقطع ليها شعرها بجنوية وكان غادي يقطع ليها يديها . كما تسبب ليها فجروح غائرة على مستوى اليد.