كود كازا ////
صعيب تكون رئيس حكومة بلا شخصية بلا قدرة على التواصل على الشرح. بنعرفة او سعد الدين العثماني رئيس حكومة المغرب من هاد النوع. خرجتو الاخيرة فنادي “ليكونوميست” كشفات ضعفو لكبير. ما متحكم فوالو. لا فالكلام لا فالسياسة لا فالحكومة.
كيبان ما عارف والو. سولوه على اقالة وزير المالية والاقتصاد محمد بوسعيد٬ فقال كلام كيشبهو “جلالة الملك مارس صلاحياتو الدستورية”. ثم اضاف “القرار عندو دلالات ان لا احد فوق القانون وفوق الدستور”.
وقال باللي الملك استاشرو فهاد القرار. هو اللي قالها.
ولكن المقطع اللي بين فيه مستواه هو باش قال “الكثير من الاخبار والتفسيرات =حول اقالة بوسعيد= “ليست صحيحة ولا دقيقة” كلشي كيتنسى اش غادي يقول. وسمعو لكمالة “بلاغ الديوان الملكي واضح واظنو انو كاف”. هاد البلاغ اللي كيهدر عليه هاد اللي ما عمرو طفرو فحياتو السياسية وخدا بلاصة كثر منو ولبس كسوة واسعة عليه٬ ما قال والو غير “ربط المسؤولية بالمحاسبة” ما فيهاش لا اش نا هي المسؤولية اللي قصر فيها.
جاه سؤال على واش ممكن للملك يقيل رئيس الحكومة اللي هو بنعرفة؟ المرة الاولى دار راسو ما فهمش السؤال ثم رد بجواب غامض “اللي عيني جلالة الملك ايلى كان من حقو الدستوري راه الديموقراطية…. من حقو. كانت اقالات يشير حتى الوزرا ليسو بعيدين عن الاقالة”. ما قال والو ما جابوش على السؤال
