سهام البارودي – كود//

واخا ماعنديش مع الكورة بزاف و لكن فهاد المونديال مورا ماتقصى المغرب، كانلقا راسي كانساند و نشجع فرانسا اوطوماتيكمو !

بعض النظر على اللعب ديالهم ! كانشجع فرانسا حيت كانبغي فرانسا ! ايه كانبغي فرانسا ! شفت فحالا ولا عيب فالمغرب انك تشجع فرانسا … و حتى فوسائل التواصل الاجتماعي الناس لي كاتشجع فرانسا كاتحس بيها فحالا حشمانة من راسها و ماقاداش تقولها ( طبعا كاين لي ماكايشجعش فرانسا لأسباب رياضية محضة و هذا انسان يحترم) ولكن هادشي ماكايمنعش انه كاين واحد المزيج من الحقد و الغل طغا على بنادم و خلاه يكره ديك البلاد و لي يجي منها.

علاش ؟

انا بعدا كاتعجبني فرانسا كبلاد و كحضارة و كتاريخ و عزيزة عندي و كانحس بيها الاقرب ليا ! خير فرانسا على الانسانية سابق ! و كون كنت فرنسية كنت غانكون فخورة بالانتماء لديك البلاد ! و حتى وانا ماشي فرنسية انا فخورة انه فرانسا بلاد قريبة ليا كانقدر نمشي ليها و نهضر لغتها و نقرا جورنالاتها و كتوباتها و نتفرج فبرامجها و قنواتها !

طبعا فهاد اللحظة غاتنقز نتا آ بوكليليخ تقوليا ! حيت نتي ” بنت ماما فرانسا” زعما صافي دابا عايرتيني ! قمعتيني ! جبتيها فالعين العورة !!  لا يا ولد القحبة ! انا بنت مي و با ” و لكن ماكرهتش كون كنت بنت “ماما فرانسا” ! شكون غايكره يكون ولد ديك البلاد ؟ يقرا فمدارسها و يتداوا فسبيطاراتها و يعيش ديك ” حرية-مساواة-أخوة” و يكون عندو باسبور فرانسا لي كايدخل بيه لبزاف ديال البلدان بلا مايحتاج فيزا ! كولا ويكاند فشي بلاد فاوروبا مبرع مفيك مع راساتك.

غاتسكت نتا و غاينقز داك ولد القحبة لي حداك يقوليا ”  يا إلهي كيف تشجعين بلد المستعمر ؟! كون شافوك جدودك كون رجموك بالحجر” !

راه نتا يا ولد القحبة لي خاص لي يرجمك بالحجر ! 2018 هادي ! انا ماحضرت لاستعمار ! ماشفت استعمار ! انا بنت اليوم ! ماشي مجبرة نعيش على انقاض الماضي ، ثم هاهي استعمراتنا و من بعد ؟ تا المغاربة استعمرو الاندلس ؟ و من بعد ؟ الاستعمار و الاستغلال امر وارد و عادي منذ ظهور الانسان على وجه هاد الارض ! و حنا ولاد اليوم و اليوم كايجيني من فرانسا غير الخير و الاحسان و الكتوبة و البرامج التلفزية لي كاتعوضني على النقص الحاد لي كانلقاه فالتلفزة الوطنية، الاستعمار الحقيقي و الاستغلال الحقيقي كايتمارس على هاد البلاد من ولادها نيت !

ثم مالكم على هاد النفاق يا ولاد الكلاب ؟

ياك فاش كاضيق بيكم الدنيا هنا كاتلاحو فالبحر فالزودياگات‌ باش تمشيو تعيشو ففرانسا ؟
و ياك فاش كاتكونو مضطهدين فبلادكم كاتجريو للقنصلية ديال فرانسا ؟
و ياك فاش كاتبغيو تقراو كادفعو للجامعات ديال فرانسا ؟
و ياك خير كتاف بزاف ديال العائلات فالمغرب كامل من دوك الفلوس لي كايسيفطو ولادهم فويسترن يونيون من فرانسا !

علاش عاتا ولات فرانسا فجأة خايبة و ولات قضية انك تبغي فرانسا و تشجع فرانسا حشومة ؟

كاطيرو فصناعة الاعداء الخياليين ! فاش ماكاتكونش الماسونية كاتكون اسرائيل ! و فاش كاتساليو من اسرائيل كاتجبدو الجزائر ! و فاش كاتساليو من الديسك ديال الجزائر كاتجبدو الديسك ديال فرانسا ! يا خويا يا خويا يا خويا على التبوحيط و نتوما براسكم شي عدو لشي ! كاتنطابق عليكم ديك المقولة ديال ” الانسان ذئب لأخيه الانسان”.