كود موسكو /////
البارح باش سالى ماتش المكسيك المانيا وربحات فيه الاولى٬ خرج شي خلق غريب غادي كيضرب الطبل ولابش الزيرو =الشماغ. ناس قلال كيغينو اغنية ماشي حتى تراثهم: سلم علاي” شوية قلبوها ضريب الدق. المكسيكيين باش ربحو لالمان دارو جو زوين. كل واحد وبوحدو ولكن خالقين الجو. ناشطين. فرحانين. كلشي يتفاعل معاهم. هاد بنادم للي خرج مجموعين اللي شاف اللي داروغادي يتفكر مسيرة ولد زروال. غير هادا ما باغي يطيح حد. باينة هادو شي اتباع ديال محمد بن سلمان الهدف هو يعطيو صورة جديدة للسعودية. العكس هو اللي حصل. عطاو صورة متخلفة كتعكس عقليتهم الغريبة. غير الرجال اللي غاديين وسط ساحة كلها شي بنات وولاد شي يبوس شي يشطح شي يشرب. بانو فهادي بوحدهم ما معاهم الا بعض الفضوليين اللي بغاو يشوفو هاد العجب.
طبعا بحال اي نوعية من هاد الادميين. دارو دورة صغيرة ومشاو ياكلو. مسيرة زروالية وصافي. كيف عانيت “كود” العرب اللي كانو تماك منخلينهم. شي مغاربة ما سلموش حتى عليهم على قبال تصويت مونديال 2030 وشي وحدين شدو فيهم. التوانسة بقاو كيشوفو بحالهم بحال المصريين. كلشي العرب جاهم هاد الشي غريب وكيحشم بيهم. كيفضلو يشطحو مع جمهور المكسيك او شي دولة خرى على يقربو لهاد بنادم.
الغريب فهاد الشعب للي جا المونديال ماشي غير كيشجع لفراقي اللي كتماركي لبيوتا عليه كيف وقع فالماتش الاول ضد روسيا٬ بل معمر موسكو وغدا ماتشهم الثاني بعد غدا الاربعاء ملعوب فروستوف فالجنوب وبعيد على موسكو باكثر من الف كيلومتر مع شي. ما جايينش يشوفو الفوت.
