كود احمد الطيب الرباط ////

عندنا فالمغرب شي محللين او متابعين كيعطيو قراءة سريعة بزاف بزاف لاي حاجة كتوقع. دابا مع هاد المقاطعة ما خداوش وقتهم يشوفو يتبعو يعرفو شكون كيحتج وعلاش. شي وحدين رفضو كاع يديوها فشكون طلق هاد الشي. فحركة عشرين فبراير كان السؤال شكون طلق هاد الشي ماشي مهم حقاش وسائل التواصل الاجتماعي ما كانش بنفس القوة اللي عليها اليوم٬ او باش نكونو اكثر وضوح ما كانش هاد الشي ديال بيگ داتا بحال اللي بان بعد 2011.

دابا ممكن لهاد الشي ديال فايك نيوز ولكذوب مع الفو بروفيل يغير كلشي. شوفو اش وقع فبريطانيا مع البريكسيت واللي دفع النگليز يغادرو الاتحاد الاوربي والحالة الباينة بزاف هي انتخاب رونالد ترامب واللي تورطات فيها فايسبوك اللي عطات معطيات شخصية ل”كامبريدج اناليتيكا”. حتى ولى مول الفايسبوك كيقدم شهادتو فالكونگريس ويعتاذر.

يعني دابا ممكن تصنع رأي عام وتخلق قضية ولو بالكذوب.

دابا اجي نشوفو هاد حملة المقاطعة اللي بانت فالفايسبوك وانتشرات فالمغرب وخدات ابعاد كثيرة. شكون هاد المقاطعين؟ ماشي اللي طلقو النداء هادا خاصو ناسو متخصصين٬ ولكن اللي دعموها. غاديين نعتامدو على اللي شفناه وقريناه.

فهاد الفئات كاينين اللي صادقين. يعني اللي دخلو فهاد الحملة وهما مأمنين بيها. هاد الفئة ماشي هي الاكثر عددا ولا هي الاقل عددا. المهم كاينة. فهاد الفئة كاينة طبقة متوسطة واكلاها بزاف بالمغرب. فيها من الموظف اللي كياخد 4 الاف درهم الى اللي كيشد 25 الف درهم. صعابة عليهم الحياة خاصة ان المواد اللي قالو يقاطعوها كيستهلوها بشكل من الاشكال. فهاد الفئة كاين حتى لمرگردين. لقاوها فرصة للاحتجاج. واخا ما كيشريو والو من هاديك المواد. كيشربو اتاي وسيدي الروبيني وليصانص ما عندهم بيها علاقة ولكن انضمو معولين شي نهار يتم مقاطعة الدگيگ ولا السكر ولا الزيت ولا غير يخلعو الدولة.

كاينة فئة ضمن هاد الفئة لمگردة واخا مقاطعين خلوق هاد المنتوجات و لكن كايقاطعوها دابا ضد وعكس فالغلاء، ماشي على امل كلشي يرخاص من بعد و صافي ( دقيق، زيت، سكر) بل على امل انهم يقدرو تاهوما يشربو سيدي علي واحد النهار ( راه كاين واحد التعليق كايدور فالفايسبوك كايطالب مريم بنصالح تهبط تمن يطرو و نص د سيدي علي لجوج دراهم هههههه) ! لي كتبو باين فيه ماباغيش يشرب و صافي حيت لاباغي يشرب ما معلب راه كاينة باهية تاهي ديال مريم بنصالح كادير تسعود دراهم لبوديزة د خمسة يطرو يعني درهم و ثمانين ليطرو ! لي كتب هاد التعليق باغي يشرب الما و معندي نعام آ سيدي !

فهاد الفئة كاينين اللي ما كيهمهمش المواد اللي عليها المقاطعة ولكن المستهدفين. داخلين فيها السياسيين. عندهم حسابات سياسية مع عزيز اخنوش ومع مريم بنصالح ولقاوها فرصة للانتقام. هادو تلقاهم ما مقاطعين والو ولكن حاضرين فوسائل التواصل الاجتماعي باش يحيحو. فهاد الفئة يمكن تلقى فئة من حزب العدالة والتنمية لانهم يعتاقدو ان اللي لعب دور فانهاء مرحلة بنكيران هو التجمع الوطني للاحرار ماشي خيانة صحاب بنكيران وفي مقدمتهم ابن عرفة الي رئيس الحكومة الحالي.

طبعا كاين فئة مغاربة العالم. شي وحدين انخارطو باقتناع حقاش الكوفة غلات على عائلاتهم اللي كيعاونوها فالمغرب وشي من هادوك اللي كيركبو على الموجة وكيعطيو دروس غبية وكيديرو شي مقارنات بين لبلاد اللي عايشين فيها والمغرب وهي مقارنات غبية وصافي

ففئة المقاطعين كاين تيار فالمخزن. بان مزيان مع مقاطعة شي فنانة ومع هاداك سفيان بحري اللي انضم لهاد الشي. هادو ما عندهم علاقة بالمقاطعة. قالو ليهم ديرو كيديرو. لاحظو شي وحدين كانوا ضد كاع القرارات اللي يمكن تزيد شوية فعجلة الديموقراطية فالمغرب ودابا قلبوها مقاطعة.

هاد الفئة ديال الانتهازيين فالمقاطعة كاينين ناس البام. بعضهم خاف على نهاية وشيكة لمشروعهم ولقاوها فرصة ينتاقمو من اخنوش عبر افريقيا. اللي كيشوف شي باميين كيساندو الحملة غادي يتعجب ولكن هدفهم واضح. ماشي عن اقتناع ولا تضامن مع لمقصحين فالبلاد بل لتصفية الحسابات وصافي. اللي شاف تعليقات فمواقع اخبارية فوسائل التواصل الاجتماعي لوحدين ما ماينينش. فو بروفيل وكاين حتى الات كدير نفس التعاليق فكل المواقع. حاضرة بزاف وكلها كتكرر نفس الكلام عن المقاطعة.

كاين فئة اخرى اللي هما ضحايا حميد شباط. هادوك اللي خرجو لبنكيران لحمير فالرباط باش كان رئيس الحكومة اليوم تبدلو 360 درجة وولاو من متطرفي الدعوة الى المقاطعة. باش جراو على شباط من الاستقلال بقاو يناوعرو باش يقولو للمخزن راحنا موجودين وباش ما داها فيهم حد جات المناسبة ديال المقاطعة وموركين.

وكاينة فئة اخرى انتهازية هي شي رجال اعمال. حياتهم كلها شفرة ورشوة. عايشين غير فالفساد ومعشين منو بزاف. هاد اليام قلبوها دعم بطريقة غير مفهومة للمقاطعة. طبعا ما كيهممش لمغاربة. هاد التضامن ديالهم لغز يمكن نلقاو ليه تفسير غدا