كود – وكالات//

أعلن مؤسس تطبيق “واتسآب”، جان كوم، على الإستقالة ديالو من خلال ستاتو على حسابو الشخصي فالفايسبوك، وقال “كوم” في بيانو : “وصل وقت المغادرة، كنت محظوظ بزاف بالعمل مع هاذ الفريق الصغير باش نقدمو تطبيق كيستخدمو عدد هائل من الأشخاص فجميع أنحاء العالم، غادي نمشي فحالي فالوقت الي كيستخدمو فيه الناس تطبيق واتسآب بطرق أكثر بكثير، مما كنت كنتصور، وفريق العمل قوي بزاف وغادي يستمر فالقيام بأشياء واعرة بزاف “.

ورجعات مجلة “فورتشن” الأمريكية استقالة مؤسس “واتسآب” من إدارة التطبيق ومن مجلس إدارة “فيسبوك”، لعدم موافقتو على طريقة استخدام منصة التواصل الاجتماعي، للبيانات الشخصية الخاصة بالمستخدمين على “واتسآب”، حيت ديما كان كيحارب كافة محاولات “فيسبوك” لتقليل مستوى “تشفير البيانات” على “واتسآب”.

وكانت تقارير عديدة كتقول أن موقع “واتساب” كيحتفظ بنسخة من بيانات المستخدمين ديالو، واخا إدارتو علنات شحال هادي أنها كتتبع منظومة التشفير الكاملة “End to End”، الي مكتسمحش لطرف ثالث من أنه  يتجسس على المحادثات أو الدردشات الخاصة بالمستخدمين، إلا أن المخاوف بقات مستمرة.