كود ابيدجان ////

ليلة غريبة دازت البارح. غريبة بتزامن احداث مغربية. سوفيتيل اللي فيه نازل المنتخب ولى عامر غير بالمغاربة. البارح اكثر حقاش كان شي حدث على المغرب وشي تخربيق اخر وتبنى واحد الشاطو كبير وعرضو على مسؤولين ايفواريين وغيرهم. تزاد هاد الحدث على لوطيل اللي كيغلي بالمغاربة. بزاف بزاف بزاف. فين ما دور تلقاهم غير هما. ساكنين فيه او ما ساكنينش. كلشي كاين.

فحي تريشفيل وبقصر الثقافة غير بعيد على سوفيتيل كان حسن الفد داير سبيكتاكل ديالو على “كبور بناني سميرس”. نص القاعة بقات خاوية. تزامنو مع حفل المغرب خلا الناس تفضل تاكل وتلاقى مع شخصيات على تجي للحفل. الناس ما فلتاتش بزاف. حسن الفد المبدع القافز دار على شخصية عطات كلشي فالسلسلة. تجي وتجيب واحد غريب كيسولو بالعربية الفصحى وغير حضورو يهرس الايقاع ويبدى يسول الفد على شخصية كبور وطبعا لابس لباسها ما عندو معنى. كاين مشكل الابداع وكاين مشكل لانسبيراسيون وكاين مشكل اللعب حتى هو.

كون دارو وان مان شو بوحدو كان يكون احسن. الحفل فيه تصفية حسابات مع الشعبية او دنيا بوطازوت اكثر منو استرجاع شخصية كان ابدع في تجسيدها.

الحفل الحقيقي كان فبارات ومطاعم ومراقص ابيدجان. فين ما درتي تلقى لمغاربة بالتوني كيدورو. فزگو التوني البارح قبل ما يوصل الماتش ديال اليوم مع الخمسة. قصرو نشطو شربو….. طبعا هاد الشي كان فاطار من النظام والاحترام فالحالات اللي حضرات ليها “كود”. المهم السياحة استفدات بزاف من هاد 3600 مغربي اللي جاو غير من المغرب مع “لارام” فهاداك لوفر ديال الفين درهم.

مقابل هاد النشاط قبل فالملعب واثناء التدرايب كانت فوضى ما مولفاش للمنتخب زمن رونار. لقاو الصحافيين ريوسهم مع عدد كبير من الجمهور دخل للتيران. شي باغي يتصور شي باغي يدير سيلفي وفالخلفية اللعابة شي كيدير تغطية غير بوحدو لصفحتو. فوضى وصافي. ماشي غير الجامعة اللي مسؤولة عليها بل الاتحاد الافريقي والمنظمين الايفواريين. علاش دخلو هادو وكيفاش واش بغاو

ها الصباح قبل ساعات من الماتش بداو المغاربة يدخلو. كلشي غاديين يدخلو بتوني حمر وراية. هاد الشي توزع عليهم البارح. غاديين تجمعو فبلاصة وحدة واش يعاونو المنتخب. مع النشاط البارح غاديين يكونو ناشطين فتشجيهم