سهام البارودي- كود
—
واش المغاربة كاياكلو و لا غير كايعمرو كرشهم بلي عطا الله؟
شحال هادي بنادم كان كايعمر كرشو بلي عطا الله خبز، روز، شعير حسب الثقافة لي عايش فيها و كايمسح فمو و يجمع الوقفة، كان واحد الوعي بالعلاقة بين التغذية و الجسم السليم ديال الانسان و كان بنادم كايعرف كيفاش يداوي بعض الامراض و لا يتفاداها بالماكلة ولكن العلاقة ماكانتش متطورة بزاف و كانت اهم حاجة كايشوفها الانسان فالماكلة هي محاربة الجوع و صافي. فأوروبا و ميريكان و الدول الكبرى مع التقدم العلمي و التكنولوجي تطورات العلاقة بين بنادم و الماكلة بانت الثقافة ديال التغدية (la nutrition ) وبدات غاديا و كاتنتاشر فالعالم كامل، حتى ولات ” التغذية” علم قائم بذاته، بنادم كايقرا باش يعرف شنو المكونات لي كاينة فكل ماكلة و كيفاش يقدر يستافد منها الجسم و كيفاش تقدر ضرو ؟! شحال خاصك ديال السكريات فالنهار ؟ شحال خاصك ديال البروتينات الحيوانية ؟ شحال ديال الدهنيات؟ شحال من بيضة فالسيمانة؟ واش التغذية ديالك هي هاديك و لا خاصك تبدلها و هادشي كامل بمراعاة السن ديالك و الجنس و المجهود البدني حيت واحد خدام عطاش كايدوز النهار كامل فتامارة ماعندوش نفس الاحتياجات الغذائية ديال واحد موظف النهار كامل و هو جالس فالبيرو و ماعندوش نفس الاحتياجات الغذائية ديال مرا كاترضع.
للأسف عندنا مازال بنادم واحل فالسطاد ديال محاربة الجوع، و واخا تحسن المستوى المعيشي ديال المغاربة ديال اليوم مقارنة مع المغاربة ديال عام البون مازال كاينين الناس لي متيقين ديك الهضرة ديال ” كبرنا غي بالخبز واتاي و هاحنا صحاح فصاح” و هو نهار غايطيح خراه مايجمعوه شراوط، و لا ناض شي واحد كايغوت كاتسمع” وا خونا شبع خبز و ضسر ضسر ضسر” على اعتبار أنه الخبز هوا الطوب ديال الماكلة و لا شبعتي خبز خاصك تضرب الطم و تحمد الله و تشكرو، و ماشي غريبة تسمع المرا لي جالسة حداك فالتران كاتفتاخر بلي ” الحمد لله المغرب ماكايموت فيه تاواحد بالجوع و كل نهار كايخرجو ميكة ديال الخبز يلوحوها” حيت كاتشوف بلي اجتياز مرحلة الجوع وحده انجاز يستحق الحمد و الثناء.
و فعلا المغاربة حسب احصائيات المنظمة العالمية للتغذية ماكايموتوش بالجوع و كاياكلو عرام ديال الخبز واتاي و بالمقابل شوية ديال الخضرة و اللحوم و الديسير، هادشي راجع للمستوى المعيشي من جهة لي مضعضع شوية و لانعدام ثقافة التغذية من جهة أخرى، و هادشي لي كايعطي بزاف ديال المغاربة خصوصا الاطفال و المراهقين لي ماكايموتوش بالجوع وي و لكن كايعانيو من سوء التغذية، الكرش عامرة وي ! ولكن باش؟ بالخبز واتاي و المرقة و شي لفتة من شي گصعة ديال كسكسو وشي شنتيفة ديال الدجاج تخاطف عليها هوا و خوتو، كيفاش غايكبرو هاد الدراري و يكون عندهم نمو جسدي و عقلي سليم ؟ مايمكنش! فيناهوا الكالسيوم؟ الحليب ؟ الفرماج ؟ البروكولي !؟ الحوت؟
و فاش كاتجي تشوف كيفاش علاقة المغربي مع الماكلة كاتلقاها علاقة لذة ( بنينة /مابنيناش)، الثمن (غالية /رخيصة) كاتشبع ماكاتشبعش و لكن قليل لي كايشوف القيمة الغذائية و الجودة ديال داكشي لي كايقصي و كايعرف شنو لي خاصو ياكل و منين يجيبو.
راه الدول كاتحارب الجوع و قلة الماكلة و سوء التغذية و منوضة الصداع و الهيالالة فالمنظمات العالمية ماشي على ود داك البعد الانساني و صافي لا ! الناس راها عارفة بلي سوء التغذية عندو تكلفة اقتصادية كبيرة كاتخلصها الدولة، حيت شعب فيه الجوع و لا ماواكلش مزيان يعني شعب مهلوك فصحتو، قليل الانتاجية، ماتعولش عليه يخدم، القدرات ديالو الذهنية و الجسمانية محدودة، منتاشرة فيه الامراض و هادشي كايخلي الدولة عمرها تگعد الراس من الناحية الاقتصادية. وفاش كاتشوف الدول المنتجة كاملة بدون استثناء كاتلقا الشعوب ديالها كاتاكل مزيان و مهلية فراسها و باين عليها التهلو فوجها ، بشرة مزيانة، سنان مستفين، صحة جيدة، ماعمر غاي تلقى شي دولة الشعب ديالها فيه الجوع و كايصنع الطيارات !؟
ماعمر الشعب لي كايتناتف على رابعة ديال الدجاج فالطبسيل مايصنع البوينغ و يصدرها !
ايه آ الحاجة عندك الحق ! المغرب ماكايموتوش فيه الناس بالجوع و الخبز موجود ! ولكن ماشي غي بوقية ديال الطحين و الما كايعيش بنادم فالقرن 21! الدراري باش يكبرو زوينين راه خاصهم لحيمات…كبيدات… بينينات…فريميجات …
وا زيري معانا آ الحاجة
