گود سبور//

لمح فوزي لقجع رئيس الجامعة الملكية المغربية لكرة القدم، إلى ان يوب بوعدي نجم ليل الفرنسي، غادي يلعب مع المنتخب الوطني المغربي فـ المستقبل.

فوزي لقجع وخلال المرور ديالو بالزوم على منصة “pass jeunes”، هضر على مستقبل المنتخب الوطني المغربي، وطمن الجماهير المغربي على ليكيب ناسيونال فـ السنوات المقبلة، واكد انه كاينين اللاعبين اللي غادي يكونو الخلف وراهم دابا فـ المنتخب المغربي لاقل من 20 عام واقل من 17 عام، ولاعبين اخرين اللي كايتألقو دابا ومازال ما إلتحقوش بالمنتخب المغربي بحال ايوب بوعدي.

لقجع زاد وضح وقال انه كاينة حلقة متواصلة ديال تراكم الأجيال اللي كاتربط الحاضر والمستقبل، وانه بمركز محمد السادس لكرة القدم كاين كثر من 25 فريق وطني بين الذكور والإناث والفوتسال وبمختلف الأعمار السنية.

وكاينة منافسة قوية بين الجامعة الملكية المغربية لكرة القدم والجامعة الفرنسية لكرة القدم، على خدمات اللاعب المغربي الشاب ايوب بوعدي مول 17 عام.