كود الرباط//

حصلت “كود” على تفاصيل إضافية تخص صفقة تنظيم “جيتكس 2025” بالمغرب، والتي بلغت قيمتها 12 مليار سنتيم، واللي عليها جدل كبير خصوصا وأن نفس الشركة لي خدات المارشي العام لي فات خداتو هاد العام.

القصة ديال هاد المارشي (لي منشور ف بوابة الصفقات العمومية)، بدات من نهار تحط الاعلان عن الصفقة، للي تقدمو ليها 5 شركات منهم شركات كبيرة ولفات ديما تربح المارشيات الكبار (من المالية للرياضة لغيرها).

المارشي فيه منافسة بين هاد 5 شركات حول خدمات تهيئة المساحات المخصصة للمعارض لدورة 2025 لمعرض GITEX Africa الذي سيقام في المغرب، بمدينة مراكش، بحيث تحدد الموعد النهائي لتقديم العروض في 11 أكتوبر 2024، الساعة 10:00.

فـ11 أكتوبر 2024، قدمت العروض ديالها، وكيف كيعرف الجميع المتتبع لهادشي ديال الصفقات العمومية، كانت لجنة تقنية مهمتها استقبال ملفات الشركات ودراستها وفق مراحل ومعايير دقيقة.

وحسب مصادر مطلعة على هاد المارشي، كانت اللجنة التقنية المكلفة بدراسة الملفات مكونة من 10 أفراد منهم ممثلي وكالة التنمية الرقمية ADD وممثلي قطاعات وزارية، وللي درست فالمرحلة الأولى الملفات الإدارية لكل شركة.

وكيف ما هو منشور فالبوابة الالكترونية للصفقات العمومية، فراه 4 شركات تقصات فالمرحلة الأولى من مراحل دراسة ومناقشة العروض المقدمة، بسبب عدم إدلاء بالوثائق اللازمة في المرحلة الأولى (مرحلة وضع الظرف الإداري المتعلق بالتعريف بالشركات والتصريح بالشرف والوثائق التعريفية).

موراها كتجي المرحلة الثانية متعلق بوضع الظرف التقني لكل شركة، وهنا طبعا بقات غير شركة وحدة وهي TOW WAYS .
وإليكم وضعية المارشي من لول حتى الأخير:
• التاريخ والوقت النهائي لتقديم العروض: 11/10/2024 الساعة 10:00
• المرجع: 28/2024
• الموضوع: تنفيذ خدمات تهيئة المساحات المخصصة للمعارض في إطار تنظيم دورة 2025 لمعرض GITEX Africa بالمغرب.

وضعية الشركات:
1/ TWO WAYS بالنسبة الظرف الإداري: مقبول، والظرف التقني : مقبول، الظرف المالي: • قبل التصحيح: 119,199,996.12 • بعد التصحيح: 119,199,996.12
2/ RIMCOM GROUPE، بالنسبة للظرف الإداري : مرفوض، الظرف التقني: مغلق، الظرف المالي: مغلق.
3/. LA NOUVELLE SOCIETE AVANT SCEN، بالنسبة للظرف الإداري: مرفوض، الظرف التقني: مغلق، الظرف المالي: مغلق.
4/ NOUVEAU HOMO SAPIENS، بالنسبة للظرف الإدارية: مرفوض، الظرف التقني: مغلق، الظرف المالية: مغلق.
5/ TLS GROUPE، وبالنسبة للظرف الإداري: مرفوض، والظرف التقني: مغلق، الظرف المالية: مغلق.
بخلاصة، تم قبول شركة “TWO WAYS” فقط في جميع مراحل التقييم وقدمت عرضاً مالياً بقيمة 119,199,996.12 درهم (قبل وبعد التصحيح). وتم استبعاد باقي الشركات خلال المرحلة الإدارية. وهادشي كان فاجتماع مطول فيه كثر من 6 ساعات يوم 11 أكتوبر الجاري.

دبا واخا تم قبول هاد الشركة، فراه كاينا مرحلة أخرى كتعلق باستكمال وثائق الملف، واللي فيها اسبوع على الاقل كآجل لتقديم الوثائق اللازمة، ثم موراها كاينا امكانية الطعن فهاد المارشي من طرف الشركات الأخرى المنافسة وذلك من خلال تقديم شكايات للجنة الوطنية للطلبيات العمومية وهنا كتبدا مسطرة أخرى ديال التحقيق في ملف الصفقة.