كود الرباط//

القيادة الجماعية للأمانة العامة لحزب الأصالة والمعاصرة، دارت اجتماع ولقاء مع نواب الحزب للي فالجهة الشرقية، مساء يوم الخميس 16 ماي 2024.

اللقاء الذي ترأسته منسقة القيادة الجماعية فاطمة الزهراء المنصوري وعضوي القيادة محمد المهدي بنسعيد وصلاح الدين أبوالغالي، نوقشت خلاله مجموعة من القضايا التي تهم الجهة.

ويندرج هذا الاجتماع في إطار سلسلة اللقاءات التواصلية التي أطلقتها القيادة الجماعية وسطرتها مع جميع هياكل وتنظيمات الحزب، بهدف تجديد التعاقد ومواصلة النقاش والحوار حول مختلف القضايا التي تهم الشأن السياسي والحزبي بكل الجهات.

البام كيقول بلي هادشي فاطار اللقاءات التواصلية، في حين مصادر “كود” كتقول بلي السبب علاش بداو بهاد الجهة هي أنها كانت معقل عبد النبي بيوي، أحد المتهمين الرئيسيين في ملف اسكوبار الصحراء (الاتجار الدولي للحشيش والتلاعب في بيانات مالية وغيرها من التهم).

الجهة الشرقية كان كيحكم فيها بيوي، فاش مشا خلا فراغ كبير لحزب التراكتور، ولهاد السبب كتجري المنصوري ومن معها باش تعمر الفراغ التنظيمي والسياسي.

البام فنسخة جديدة كيوجد أكبر عملية تغيير داخلية، خصوصا بعدما بعد عليه كل من محمد الحموتي، واحد من أعيان الريف وعندو علاقات نافذة وفي نفس الوقت طاشرون كبير فالبني وعندو علاقات متشعبة ماليا وانتخابيا، وابعاد العربي المحرشي اللي كان حاكم لازون ديال جبالة قبل ما تراجع شعبيتو وكان مهدد باش ميطلع للبرلمان فانتخابات 2021.

مصادر بامية قالت لـ”كود” بلي هذا عهد جديد ديال التخليق، واللي درناه فالشرق نديروه فالشمال والريف وباقي المناطق، في اشارة إلى امكانية ابعاد كل الاعيان والمسؤولين اللي عندهم شبهات من أي دور سياسي أو تنظيمي مستقبلا فالبام.