كود – كازا ///

أكتيڤات الشرطة الوطنية الإسبانية، البارح الجمعة، بروتوكول التدخل الاستباقي ضد التوقفات الاضطرارية ديال الطيارات بـمطار بالما (جزر البليار) باش ما يتعاودش سيناريو “سلتة مايوركا”، حيث تم نشر فرق من البوليس ولاگوارديا سيپيل بعد الهبوط الاضطراري ديال 2 طيارات كيربطو المغرب وناميبيا ب ألمانيا.

ووقعات الحادثة ف الساعات الأولى من صباح الجمعة، وبحسب بلاغ شرطة البليار، تم تفعيل الإجراء استجابة للبروتوكول المذكور اللي تم اعتماده بعد الإنذار الصحي الكاذب ديال نونبر 2021، اللي تسبب ف هروب جماعي ل 22 راكب مغربي بغاو يحرگو لإسبانيا.

وحسب تقارير إخبارية، تم تجنيد حراس أمن من الشركات الخاصة والخدمات الصحية ورجال الإطفاء وأفراد من مناطق مختلفة بمطار مايوركا، قبل استئناف الرحلتان طريقهما للتوجه إلى المطارات الألمانية. ولم يتم الإعلان عن سبب الهبوط الاضطراري ديال هاذ الطيارات فوق التراب الإسباني.