كود سيدي رحال//

علمت “كود” أن مواطن في سيدي رحال بنا واحد البيت في السطح بلا ما ياخذ ترخيص، وهدا مخالف للقانون ومللي السلطة صاقت الخبار، مشات باش تدير اللازم، وتوجهات للدار المعنية لي كاينة فحي التنمية بسيدي رحال الشاطئ، باش توقف على الخروقات وتريب البيت للي فالسطح، لكن وقع للي ما كانش متوقع، مللي بنت مول الدار للي فعمرها 30 عام تخلعات وماتت.

وقالت مصادر “كود” جات القوات العمومية باش تشوف المخالفة وتهدم البيت للي تبنا، بطريقة ماشي قانونية لكن مول الدار ما بغاش يخليهم يديرو خدمتهم. وكتضيف مصادر “كود” أنه وقتها حاولت السلطة تستخدم القوة، عوض تحرير محضر بهاد المخالفة وتقديمو إلى المحكمة باش تتخذ المتعين.

وقالت مصادر “كود” إن أعوان السلطة، للي كيتقدمهم واحد الخليفة فيه الزيادات، حسب نفس المصادر، دخلوا في شنآن مع الأب ديال الضحية، اللي سد الباب ديال الدار ديالو ومنع رجال السلطة من الدخول، لكن واحد المقدم يلقب بطائر، حاول اقتحام باب المنزل بالقوة، وهو المشهد اللي خوف وخلع الضحية وجعلها تسقط سقطتها الأخيرة التي لم تنهض بعدها أبدا، حينت كتعاني من مرض في القلب.
ومنين نقلوها للمستشفى تم اخبارهم أن مون الأمانة دا الأمانة ديالو.

وكان هاد الحادث سبب خلا الناس تهضر باستياء على ما وصفوه ب “بطش” عناصر السلطة وعدم احترامهم للقانون وعدم احترامهم لحرمات البيوت، وعدم تشبع بمبادئ القانون التي تفرض اتباع مساطر محددة في زجر مخالفات التعمير، وهو في الواقع راه مول الدار للي بنا البيت بلا رخصة هو لي ما احترمش القانون.

وعلمت (كود) أن عناصر الدرك الملكي فتحات بحث في هاد النازلة في انتظار تعليمات النيابة العامة لاتخاذ المتعين.