كود سبور//
كيتعتبر منتخب الصبليون اللي غادي يلعب ضد المغرب فثمن نهائي كأس العالم قطر 2022، أحسن منتخب فالاستحواذ وفالحفاظ على الكرة فالبطولة ملي بدات.
وقدرت الصبليون تحت قيادة لويس إنريكي تكون أحسن منتخب كيشدو اللعابا ديالو الكرة فرجليهم فدور كروبات مونديال 2022، بنسبة استحواذ على البالون فالماتشات اللي لعبات وصلات 79.9% حسب إحصائيات الإتحاد الدولي لكرة القدم “الفيفا”، وطبعا هادشي ماشي غريب على لاروخا حيث أصلا الصبليون كتلعب على “اتاك بلاصي” والضغط على الخصم فالمناطق ديالو لاسترجاع الكرة بسرعة فحالة ضاعت منها.
أما بخصوص المنتخب الوطني المغربي اللي نجح تكتيكيا تحت قيادة وليد الركراكي فدور المجموعات قدام 2 منتخبات حتى هما كيموتو على الاستحواذ فحال كرواتيا وبلجيكا، وقدر يكون واقعي وتكون عندو الفاعلية قدام المرمى ديال الخصم فبلغت نسبة السيطرة ديالو على الكرة 36.5% وكيحتل المركز 28 فترتيب استحواذ المنتخبات على الكرة فالدور الأول من كأس العالم 2022 حسب الفيفا.
صحيح أن الاستحواذ وامتلاك الكرة كثر من الخصم عامل مهمة ولكن الأهمية ديالو قلات فالسنوات الأخيرة، والدليل أن منتخب الصبليون براسو اللي عندو أكبر نسبة استحواذ فكأس العالم إلى حدود الآن كان غادي يتقصى وتأهل بصعوبة فالكروب 5.
أما المنتخب الوطني المغربي واللي نسبة الاستحواذ ديالو على الكرة قليلة بزاف فحالة قارنها مع الصبليون ولكن قدر يتأهل متصدر لكروب 6 برصيد 7 النقاط، على حساب وصيف بطل العالم كرواتيا وثالث العالم بلجيكا اللي ما قدروش بالاستحواذ ديالهم يماركيو على الأسود، فالوقت اللي الركراكي وولادو كانت عندهم الفاعلية وماركاو 4 البيوت فهاد الدور وتماركا عليه هدف واحد فقط.
منتخب الصبليون الخصم المقبل ديال المنتخب الوطني المغربي فثمن نهائي كأس العالم ومول أحسن نسبة استحواذ إلى حدود الآن فالمونديال تماركاو عليه 3 البيوتا وماركا 9 الأهداف (1 على الجابون و 1 لالمان و 7 على كوستاريكا) ولكن واخا هادشي البارح قدام منتخب الجابون تأكد بلي الصبليون حتى هو منتخب يقدر يخسر والخصوم ديالو يقدرو يتغلبو عليه ولو القوة لكبيرة اللي عندو ديال الاستحواذ على الكرة، ولكن الجابونيين بنسبة امتلاك قليلة للكرة ما تجاوزاتش 17% فالماتش، وهي أضعف نسبة فتاريخ ماتشات كأس العالم، قدرو يربحو ويتأهلو على رأس مجموعتهم وكان ممكن الصبليون تقصى كون وقعت المفاجأة فالماتش الآخر فنفس لكروب 5، ولو أن كوستريكا ربحت لالمان.
للإشارة فاخر ماتش ما بين المنتخب الوطني المغربي والصبليون كان فالجولة 3 من دور مجموعات كأس العالم روسيا 2018، وسالا تعادل 2 مقابل 2، مع العلم أن هذاك الماتش كان فيه جدل كبيرة على التحكيم وتقنية “الفار” وبزاف ديال المتتبعين فالعالم شافو بلي المغرب تظلم وكان خاصو يخرج رباح.
