محمد سقراط-كود///
أغلب التدخلات ديال البوليس ضد المجرمين الموثقة بالفيديو كتجيب الفقصة، كاين طبعا تدخلات بوليسية واعرة وبقات متورخة بحال داك البوليسي لي جمع بنص واحد هاز جوج سيوفة جابو على قلقولة راسو، ولكن في نفس الوقت كاين مثلا فيديو ديال واحد هاز جوج سيوفة وواقف في باب عمارة في مكناس والبوليس جابدين السلاح وكيرغبوه يحط الجناوا ويمشي معاهم بطريقة سلمية حضارية، بالنسبة لينا كمواطنين مسالمين كيحتارموا القانون وكيخلصوا الضرائب ديالهم وكيعانيو من الشمكارة والحباسة والمجرمين في الفضائات العامة، راه كيجينا هادشي فشوش مبالغ فيه للمجرمين وإحترام كبير ليهم كثر من الإحترام والتعاطف لي خاص يكون مع الضحايا ديالهم، واحد مجرم قتال شفار كريسور هاز جوج سيوفة ومروع مدينة على قدها، فاش كنشوفو البوليس حريص على السلامة الجسدية ديالو وحريص كل الحرص على أنهم يشدوه بلا مايوقع ليه أو ليهم والو كتحس بلي المجرم ولات عندو أفضلية في البلاد على الضحايا، حيت العطف والإحترام لي كيتعامل بيهم هو راه كانوا منعدمين عندو في التعامل مع ضحاياه، كتلقاه واقف على بنت فايقة مع النبوري غادا تخدم ومحيد ليها بزطام ومحنك ليها وجه، أو قاطع ليها يد بحال لي وقع في كازا لواحد البنت مسكينة وفي اللخر المجرم دوز شوية دالحبس وخرج في العفو وهي بقات بلا يد حياتها كاملة كيتها ماتبراش.