وكالات //
تيرا واحد الولد يلاه عندو 4 سنين فعمرو، بفردي فالبوليس فميريكان باش “يدافع” على باه اللي كانو غادي يعتاقلوه.
ونشرو البوليس فميريكان شنو وقع بالتفاصيل فهاد الحادث، وقالو بللي جاهم تيليفون كيخبرهم بللي كاين شخص، عندو 27 عام وسيمتو “Sadaat Johnson”، حيح على الخداما ديال “ماكدونالدز” بسباب الكوموند ديالو اللي ماكانتش هي هدايك، وجبد فردي وبدا كيهدد فيهم، ومباشرة مشاو البوليس باش يعتاقلوه.
شبكة “فوكس نيوز”، قالت مللي وصلو البوليس حظا ريسطو “ماكدونالدز”، فمدينة “Midvale” التابعة لولاية “Urah” فالغرب الميريكاني، حاولو يعتاقلو الراجل من وسط طوموبيلتو اللي كانو معاه فيها جوج وليدات صغار (واحد عندو 4 سنين ولاخور 3)، هو يهز ولدو مول 4 سنين الفردي وتيرا على البوليس.
الحادثة الخطيرة وقعات فشهر فبراير اللي فات، صوراتها كاميرات البوليس وغير مؤخرا تسرب وراج الفيديو ديالها فوسائل إعلام وبزاف على مواقع التواصل الاجتماعي.
وماتضرب تا واحد من البوليس، وقال هاد الوليد بللي كان كيحاول “يعتق”باباه منهم!!
الأب تشد فنهارو وبدات محاكمتو فشهر مارس الفايت.
