كود الرباط //

رئيس الحكومة، عزيز أخنوش، لي عندو نيشان ومعروف بصراحتو، معجباتوش مزايدات بعض السياسيين اللي هدروا البارح على الأثمنة ديال الحوالا، وقال أنهم كيزايدو بهاد الموضوع، عوض ما يناقشوا مخلفات ديال التدبير اللي خلاو للحكومة الحالية، واللي خدامة باش تعالجها.

أخنوش أكد في التعقيب ديالو على أسئلة المستشارين البرلمانيين في جلسة الأسئلة الشهرية، اليوم الثلاثاء، أنه شاف تدخلات المستشارين في جلسة البارح، اللي دواو بخطاب المزايدات على أثمنة الحوالا، وقال أنه كان من الأولى هاد السياسيين يهدرو على مخلفات ديال التدبير ديالهم لقطاع التعليم اللي ثقل على ميزانية المغاربة، و”هدشي اللي كنحاولو كحكومة نعالجوه اليوم، وهدشي هو الحقيقة والخطاب الواقعي ماشي المزايدات”.

وزاد أخنوش أن الهدرة على الأثمان طالعة ولا نازلة غير مزايدات، وأن الأسعار ككل سنة كتختلف حسب الحولي في كل الأسواق، والعرض موجود كيناسب مختلف ميزانيات المغاربة، خاصة أن بلادنا عاشت سنوات متابعة ديال الجفاف وحاليا كتواجه أزمة الماء.