وكالات //
كشف برنامج فحص طبي دارتو الشينوا للمواطنين ديالها، أن تشوهات العمود الفقري ولات ثالث أكثر المشكلات الصحية خصوصا عند الدراري الصغار والمراهقين.
الخبراء قالو أن الكَلاس بطرق خاطئة لساعات طويلة فالاقسام وقت القراية أو الدروس الإضافية، زائد بعض دروس الشطيح والرياضة اللي كتكون قاصحة ومبالغ فيها، خلات ملايين الوليدات يوليو عندهم مشكلات خطيرة فالظهر.
الدياكَنوستيك ميديكال اللي دار بين بللي كاينين حوالي 5 ملايين تلميذة وتلميذ شينوي كيعانيو من مشكلات فالعمود الفقري، وأكد متخصصو الصحة أن هادشي غيكون عندو تداعيات على توازن الأطفال العضلي، وتأثير خايب على التنفس ووظائف القلب، وأكثر من هادشي يقدر يجيهم الشلل.
وهنا فيديو كان نشرو مؤخرا موقع “Vice News” الميريكاني بعنوان “The Price of Education In China”، كيبين شوية واقع سيستيم التعليم فالشينوا وخصوصا درجة المعاناة النفسية والجسدية و تمارة اللي كتدوز على الدراري الصغار اللي فيها تجاوزات كثيرة ومعيقة بزاف، وهادشي من طرف مؤسسات بريفي اللي كتحاول ديما تبيع “وهم التفوق والنجاح” لواليدين التلامذ: