كود كازا//

المغرب مابقاش فقط واحد من الدول المصنعة لطوموبيلات ومعدات رونو وقاعدة لتصديرها، بل صبح دابا كسوق كبرى ليهل، بحيث فالنصف الأول من عام 2021، تصنف المغرب من بين 10 دول فالعالم اللي كتعتبر من الأسواق الرئيسية للمجموعة الفرنسية.

من بعد بيع 39164 طوموبيل فهذ البيريود، صبح المغرب الزبون العالمي التاسع لرونو، مباشرة بعد الصبليون اللي فالمركز السادس، وتركيا اللي فالسابع، والهند اللي فالثامن، وكيتعتبر المغرب السوق الاول للمجموعة فمطقة الشرق الأوسط وإفريقيا.

وبقا المغرب محافظ على مكانتو فليست كعميل رائد فحصة السوق المحلية بنسبة 41,7 فالمية، فليست أفضل 15 دولة من حيث حجم المبيعات، وفات بهذشي روسيا اللي عندها 31 فالمية، وفرنسا اللي عندها 24,7 فالمية.