عفراء علوي محمدي- كود//

بين طارق البخاري، اليوم الصباح، على حقدو الدفين وعنصريتو ضد المرا، من بعد ما فضحات الممثلة نجاة خير الله تحرشو بيها، وخرج يسوق خطابات كلها تمييز ضد النساء، فالوقت اللي بلادنا غادة فطريق تعزيز مبدأ المساواة والمناصفة.

وقال البخاري، فبرنامج “رمضان شو” مع مومو، اليوم الثلاثاء الصباح، أن “نجاة غير ولية مانديوش عليها”، وبدا كيكرر فهذ العبارة حتى حس مومو بنوع من الإحراج، وقال ليه “الله يهديك اصاحبي راه ماكايناش ولية ولا ماشي ولية راه بحال لمرا بحال الراجل”، قبل ما يجاوبو بأن “المرا كائن ضعيف ومرهف المشاعر”.

وهكذا البخاري جبد عليه صداع كبير مع الجمعيات الحقوقية اللي كتدافع وكتناضل على المساواة بين الجنسين، وزاد لصق عليه تهمة التحرش، الشي لي غيخلي كلشي يتعاطف مع نجاة، حيت من البديهي أن اللي كينقص من قدر لمرا كإنسان صعيب يحترمها.

وهذي ماشي أول مرة يتم اتهام البخاري بالتحرش الجنسي، بحيث سبق ليه واجه هذ النوع ديال التهم قبل.