كود ـ كازا//

كشف أديب بن إبراهيم، كاتب الدولة المكلف بالإسكان، أن برنامج (مدن بلا صفيح) وصل لمستوى مهم بزاف، بعدما قدر يحسن ظروف العيش ديال أكثر من 372 ألف و300 عائلة مغربية حتى نهاية أكتوبر اللي فات.

وقال بن إبراهيم فجوابو على أسئلة برلمانيين، إن 62 مدينة ومركز حضري ولات اليوم خالية تماما من البرارك، بفضل الاستراتيجية اللي تبنات الحكومة فتنزيل هاد البرنامج.

وأضاف أن الإنجازات تحققو رغم الإكراهات الكبيرة اللي باقا كتعترض إتمام المشروع، بحال تزايد عدد الأسر المستهدفة وضعف مشاركة بعض المستفيدين فالمشاريع اللي تسالات. وزاد يوضح أن بعض مراكز الاستقبال مازال ما كتحملش الجاذبية الكافية، وزيد عليها كلفة التهيئة المرتفعة اللي كتلزم الدولة تعبئ موارد مالية إضافية.

من ناحية التمويل، قال الوزير أن الكلفة الإجمالية ديال البرنامج وصلات لـ63.7 مليار درهم، منها 14.65 مليار درهم ساهمات بيها وزارة إعداد التراب الوطني والإسكان.

وأكد أن الحصيلة إيجابية بزاف، بحيث الحكومة الحالية فـ4 سنين حسّنت وضعية أكثر من 69 ألف و300 أسرة، مع تسجيل تسارع ملحوظ فإيقاع العمل، بحيث المعدل السنوي طلع من 6.200 أسرة فالفترة 2018–2021 إلى أكثر من 17.300 أسرة سنويا ما بين 2022 و2025.

وبحسب المعطيات اللي عرضها بن إبراهيم، راه كاينين حوالي 68 ألف و950 أسرة باقين فطور المعالجة فمشاريع سكنية سالات أو قيد الإنجاز.