كود كازا ///

حسب مصادر “كود” من ميناء طنجة فعدد كبير من لمغاربة قطعو لبحر من “طنجة المتوسط” و”طنجة المدينة” فاتجاه مينائي الخزيرات وطريفة بالجنوب الاسباني. مصدر “كود” قال باللي 6 الاف طونوبيلة خرجات من المغرب هاربة من العيد ومشات دوزو فبحر وشمس “كوسطا ديل صول”.

هاد العدد تزامن مع عدد اكبر من مغاربة اوربا دارو العكس. قطعو من الصبليون للمغرب باش يعيدو مع عائلاتهم. حسب الاعلام الصبليوني العدد قرب ل30 الف طونوبيلة وفيها 100 الف مغربي جاو من كل دول اوربا.

نرجعو اللي ساكنين فالمغرب وهربو من الحولي وغاديين يرجعو اليوم لثلاث٬ كاينة فئة اللي قطعات جو. الرحلات اللي جات من مدن المغرب لجنوب الصبليون او شي مدن اخرى كانت عامرة. اللي داز من المطار ايام الجمعة والسبت والاحد غادي يلاحظ هاد لشي. عائلات على قدها هاربة من العيد.

اللي ما عندهمش الفيزا هربو لمراكش وطنجة واكادير ومدن الشمال. كان الاقبال كبير علي لوطيلات.

كاينة فئة من اللي ما فحالهمش ما قدروش يعيدو وكاينة نسبة من اللي عندهم الامكانيات اللي هربو من الحولي. كاين تحولات كثيرة فعلاقة المغربي مع الحولي فالعيد لكبير وماشي ديما الجانب المادي هو الفاعل الاساس فتفسير هاد التحول.