كود الرباط//
الحروب الداخلية بين اثرياء مراكش لي كيملكو المطاعم الفاخرة، خرجات للعلن، فحسب مصادر “كود” فإن أصابع الاتهام كلها متجهة للملياردير العيادي لي كيملك مطاعم فاخرة وملاهي الأثرياء، ولي داير حالة فمراكش.
وأوضحت مصادر “كود” ان اغلاق أزيد من 60 مطعما من قبل السلطات، جبد ملف ثقيل، ملف غادي يتفجر مع الأيام المقبلة خصوصا وأن فيه “رائحة الخروقات فالتعمير ووهم الاستقواء بالفوق”.
عدد من مالين المطاعم تواصلو مع “كود” وقال بأنهم :”أمام وجود هاد الشخص النافذ (العيادي) لي كيدعي قربو من المسؤولين وداير خروقات غادي نكشفوها، هو سبب هاد المشاكل لي عايشين فيها المطاعم السياحية فمراكش”.
وأضافت نفس المصادر بالقول :”قررنا نديرو شكاية للسي الحموشي المدير العام للأمن الوطني باش يشوف اش واقع فمراكش.
دبا لي وقع فمراكش كيشبه لي واقع ف كازا، مصدر “كود” كيقول بلي العيادي كيتحدى كولشي وحال بوحدو محلاتو، في حين أزيد من 60 مطعم مسدود ولي كيشغل 4500 أسرة.
مالين هاد المطاعم المعنيين بالإغلاق فيه بالنسبة ليهم قاصحة بزاف ومنهم لي كيخلص فالكراء 15 مليون شهريا، جاتهم صعيبة، بلا تكلفة العمال والمستخدمين والضرائب. وكيتساؤلو :”حنا مخدامينش وكنخلصو الضرائب في حين واحد نافذ حال محل فيه خروقات منها عدم احترام تصميم التهيئة” (الصورة أسفله).
وتابع ذات المصدر :”كثر من هادشي كاين الفيديو لي كيقدم فيه مطعم ملاك لي تابع للملياردير العيادي الخدمات وراه باين واش فعلا كيحترمو الاجراءات ولا لا، كيديرو الأضواء والديجي، وهوما حالين”.
المستثمرين الاجانب والمغاربة تضررو بزاف من الاغلاق وباغين يراسلو الديوان الملكي. وفق ما صرح به مستثمر أجنبي لـ”كود” في مقال سابق.
وبالنسبة للخروقات فالتعمير بالنسبة لعدد من المطاعم الفاخرة “كود” غاترجع ليها وتوضحها في مقالات مقبلة.